गोरखा । गोरखाको आरुघाट गाउँपालिका–१ धार्चेमा जीप दुर्घटना हुँदा धार्चे गाउँपालिका–६ का वडासचिव किरण रिमालको मृत्यु भएको छ । दुर्घटनामा गाउँपालिका उपाध्यक्षसहित सात जना घाइते भएका छन् ।
गाउँपालिकाका उपाध्यक्ष फुलमाया गुरुङ, सोही गाउँपालिकाका कर्मचारी घनबहादुर गुरुङ, निशा गुरुङ, शर्मिला गुरुङ, क्यामराम्यान केयरसिंह गुरुङ, फेज नेपाल नामक संस्थाका कर्मचारी सरोज गुरुङ र जीपका चालक करौजाका बालचन्द्र गुरुङ गम्भीर घाइते भएका प्रहरीले जनाएको छ ।
जिल्ला प्रहरी कार्यालय गोरखाका अनुसार ग १ ज ५५०५ नम्बरको जीप बुधबार साँझ करिब ७ः३० बजे सडकबाट झण्डै ३०० मिटर तल खसेर दुर्घटनामा भएको हो । रातिको समयमा सामान्य वर्षा भएकाले कच्ची सडकमा जीप घुम्तीमा चिप्लिएर दुर्घटना भएको हुनसक्ने प्रहरीले अनुमान गरेको छ ।
घाइतेहरुको दोङचेतस्थित फेज नेपालद्वारा सञ्चालित क्लिनिकमा उपचार भइरहेको र थप उपचारका लागि काठमाडौं लैजाने तयारी गरिएको प्रहरीले जनाएको छ ।
