महेन्द्रनगर । सुदूरपश्चिम प्रदेशसभाका सदस्य अक्कल बहादुर रावल बलात्कार आरोपमा पक्राउ परेका छन् । नेकपाका नेता तथा अछाम निर्वाचन क्षेत्र नम्बर २ बाट प्रदेश सभाका सांसद रावल बलात्कारको प्रयास गरेको आरोपमा पक्राउ परेका हुन् ।
जिल्ला प्रहरी कार्यालय कैलालीका अनुसार एक महिलाले दिएको जाहेरीका आधारमा बुधबार रावललाई नियन्त्रणमा लिइएको हो ।
अछाम स्थायी घर भइ हाल धनगढी उपमहानगरपालिका–४ उत्तरवेहडीमा डेरा गरी बस्ने २५ वर्षीया विवाहीत महिलालाई रावल विरुद्ध उजुरी दिएकी थिइन् ।
माघ २१ गते बलात्कारको प्रयास गरेको भन्दै ति महिलाले फागुन १४ गते जिल्ला प्रहरी कार्यालय कैलालीमा जाहेरी दिएकी थिइन् । जाहेरी पछि फागुन १५ गते अदालतबाट प्रहरीले पक्राउ पुर्जी लिएको थियो । सांसद रावललाई पक्राउ गर्न अनुमति पाए पछि प्रहरीले उनको खोजी गरिरहेको थियो ।
जाहेरी परेको थाह पाएपछि रावल आफैँ प्रहरी कार्यालय उपस्थित भएका थिए । उनीमाथि अनुसन्धान भइरहेको प्रहरीले जनाएको छ ।
