काठमाडौँ । अखिल (छैठौं) ले करारका प्राध्यापक तथा कर्मचारीलार्ई स्थायी गर्ने निर्णय सच्याउन माग गरेको छ ।
अध्यक्ष देवेन्द्र कुँवरको हस्ताक्षरमा २०८० साउन ११ गते बिहीबार जारी प्रेसवक्तव्यमा यस्तो माग गरिएको हो ।
विश्व विद्यालयमा भागवन्डा र गलत निर्णयको आधारमा विश्व विद्यालयको साख गिर्दो अवस्थामा रहेको बताउँदै वक्तव्यमा त्रिवि प्रशासनको यस खालको रवैयाले नयाँ प्रतिभा पलायन भइरहेको धारणा व्यक्त गरिएको छ ।
खुला र स्वच्छ प्रतिष्पर्धाबाट प्राध्यापक तथा कर्मचारी नियुक्त गर्न माग गरिएको प्रेसवक्तव्यको पूर्ण पाठ यस्तो छ :
“करारमा रहेका प्राध्यापक तथा कर्मचारीहरूलाई आन्तरिक प्रतिष्पर्धाको आधारमा स्थायी गर्ने त्रिभुवन विश्वविद्यालयको निर्णयप्रति हाम्रो सङ्गठनको गम्भीर ध्यानकर्षण भएको छ । हामीले उक्त निर्णयलाई तुरुन्त सच्याउन र खुला प्रतिष्पर्धाबाट कर्मचारी नियुक्ति प्रक्रिया अगाडि बढाउन अनुरोध गर्दछौँ ।
सुरुमा राजनैतिक भागवन्डाको आधारमा करार सेवामा प्रवेश गराउने र पछि आन्तरिक प्रतिस्पर्धाका आधारमा स्थायी गर्ने विश्वविद्यालयको गलत निर्णयको परिपाटीले एकातिर उच्च शिक्षा अध्यापन गराउने प्राध्यापकहरूको क्षमतााथि नै गम्भीर प्रश्न उठ्ने गरेको छ भने अर्कोतर्फ पठनपाठन र अनुसन्धानका कार्य नै धरासायी बन्दै जाने अवस्था सृजना भएका छन् । योग्य र सक्षम व्यक्तिहरूका लागि प्राध्यापन पेसाको ढोका बन्द जस्तै छ ।
विश्वविद्यालयका यस प्रकारका भागवण्डा र गलत निर्णयका कारण विश्वविद्यालयको साख गिर्दो अवस्थामा रहेको छ भने प्रतिभाको पलायन निरन्तर भइरहेको छ । हामीले विश्वविद्यालयलाई यस खालका गलत नजिर नबसाली खुला र स्वच्छ प्रतिस्पर्धाका आधारमा प्राध्यापक छनौट गर्न त्रिवि सेवा आयोगलाई अनुरोध गर्दछौँ र उक्त गलत निर्णय नसच्चाए कडा आन्दोलनमा जाने चेतावनीसमेत दिन चाहान्छौँ ।”
