काठमाडौँ । अर्थमन्त्री डा प्रकाशशरण महतले लमजुङ दुराडाँडाको हलोक्रान्ति नवचेतनाको सुरुवात भएको बताउनुभएको छ ।
नेपाल प्रज्ञा–प्रतिष्ठान र हलोक्रान्ति नेपाल तथा तोयनाथ स्मृति प्रतिष्ठानको सहकार्यमा २०८० साउन ११ गते बिहीबार आयोजित “बहुआयामिक हलोक्रान्ति–२००६” विषयक एकदिवसीय विचारगोष्ठीमा उहाँले दुराडाँडाको हलोक्रान्ति चेतना र क्रान्तिको सुरुवात भएको धारणा राख्नुभयो ।
‘शिक्षाको चेतना व्यापक भएको लमजुङको दुराडाँडामा चेतनाको स्तर विकसित भएको कारण नै हलोक्रान्ति भएको भन्ने मलाई लाग्छ’ उहाँले भन्नुभयो– ‘हलोक्रान्ति सामान्य घटना होइन । हलोक्रान्तिको अगुवाई चार जना महŒवपूर्ण व्यक्तिले गर्नुभयो । त्यस बेला ब्राह्मणले हलो जोत्ने घटना असामान्य थियो ।’
गलत परम्परालाई हलोक्रान्तिले तोडेको भन्दै उहाँले गलत प्रवृत्ति, अन्धविश्वासलाई छाड्दै अगाडि बढ्नुपर्नेमा जोड दिनुभयो ।
उहाँले सबै जातजाति, भाषाभाषी, संस्कृति, सम्पदाको संरक्षण गरेर अगाडि बढ्न जरुरी रहेको उल्लेख गर्नुभयो । दुराडाँडालाई पहिलेको जस्तो हराभरा र स्मृतिलाई ताजा बनाउन सबै लाग्नुपर्ने उहाँको भनाइ छ ।
हलोक्रान्तिको महत्त्वलाई देशभर लैजानुपर्ने भन्दै उहाँले दुराडाँडामा निर्माण गर्न लागिएको हलो पार्क र हलो स्तम्भलाई सरकारको तर्फबाट सहयोग हुने अर्थमन्त्री डा महतले बताउनुभयो ।
कार्यक्रममा नेपाल प्रज्ञा–प्रतिष्ठानका कुलपति भुपाल राई, लमजुङ सुन्दरबजार नगरपालिकाका प्रमुख कृष्णप्रसाद कोइराला, विश्व हिन्दु महासङ्घका अध्यक्ष डा रामचन्द्र अधिकारी, प्रतिष्ठानका अध्यक्ष डा लक्ष्मीकान्त पौडेल र उपाध्यक्ष श्रीप्रसाद अधिकारीले मन्तव्य राख्नुभएको थियो ।
हलोक्रान्तिको नेतृत्व तोयनाथ अधिकारी, शेषकान्त, हरिभक्त पौडेल र श्रीकान्त अधिकारीले गर्नुभएको थियो । क्रान्तिमा उहाँहरूसँगै २७ ब्राह्मणले हलो जोतेका थिए ।
कार्यक्रममा पण्डित तोयनाथ अधिकारीको बुहारी सुशीला अधिकारी, लेफ्टिनेन्ट शेषकान्त अधिकारीका छोरा डा पूर्णकान्त अधिकारी, मुखिया हरिभक्त पौडेलकी बुहारी लक्ष्मी पौडेल र श्रीकान्त अधिकारीकी श्रीमती गायत्री अधिकारीलाई सम्मान गरिएको थियो ।
