काठमाडौँ । काठमाडौँ महानगरपालिकाले भद्रकुमारी घले सेवा सदनको भवन भत्काउन सुरु गरेको छ ।
काठमाडौँ महानगरपालिकाले २०८० साउन ३ गते बुधबार बिहानबाट अनधीकृत रूपमा बनाइएको संरचना भन्दै सो सेवा सदनको भवन भत्काउन सुरु गरेको हो ।
समाजसेवाको क्षेत्रमा आफूलाई समर्पित गरेकी घलेले अनाथ, असहाय, अशक्त बालबालिका, महिला, ज्येष्ठ नागरिकका लागि सो भवनमा आश्रय दिँदै आएकी छन् ।
यता, महानगरपालिकाले भने सार्वजनिक जग्गामा बनाइएको भवन भत्काउनु कानुनी राज्यको कर्तव्य भएकाले भत्काउने काम गरिएको जनाएको छ । महानगरपालिकाका नगर प्रहरीप्रमुख राजुनाथ पाण्डेले अनधीकृत रूपमा बनेका संरचना भत्काउनु परेको बताए ।
उनले कानुनी राज्यमा कानुनअनुसार काम हुने भन्दै आफूहरूले सोहीअनुसार सो सदनको अनधीकृत भवन भत्काउने काम सुरु गरेको बताए । नगरप्रहरी प्रमुख पाण्डेले आश्रय लिइरहेका अनाथ, अशक्त बालबालिका तथा ज्येष्ठ नागरिकको पनि महानगरपालिकाले आश्रयको व्यवस्था गर्ने आश्वासन दिए ।
उनले भने– ‘यो अनधीकृत संरचना हो । यो सार्वजनिक जग्गा हो । यसमा भएको संरचना भत्काइन्छ । कानुनी व्यवस्था यही हो । कानुनी राज्यमा कानुनअनुसार काम हुन्छ । भावनामा बग्ने छुट हामीलाई छैन ।’
यता, सामाजिक सङ्घसंस्थाहरूले भने समाजसेवाको क्षेत्रमा समर्पित सो सदन भत्काउने काम गरेको भन्दै काठमाडौँ महानगरपालिकाको विरोध गरेका छन् । उनीहरूले पूर्व जानकारीसमेत नगराई अनाथ, अशक्त र असहाय बालबालिका, महिला, ज्येष्ठ नागरिकलाई आश्रय दिने काम गरिरहेको सो सदनको भवन भत्काउने महानगरपालिकाको कदमलाई अत्याचारको सङ्ज्ञा दिएका छन् ।
जबरजस्ती ढङ्गले सो सदनको भवन भत्काउने काम गर्नु गलत भएको राउटे लोपोन्मुख सीमान्तकृत उत्थान प्रतिष्ठान नेपालकी अध्यक्ष सत्यदेवी खड्का अधिकारीले बताइन् ।
अन्य संस्थाहरूले पनि सो सदनलाई महानगरपालिकाले प्रयोगमा ल्याउनुपर्नेमा भत्काउने काम गरेको भन्दै आक्रोश पोखेका थिए ।
पञ्चायतकालमा सांसद हुँदै सहायकमन्त्रीसमेत रहेकी घलेले आफ्नो व्यक्तिगत सम्पत्ति समाजसेवाको काममा परिचालन गर्दै आएकी छन् । उनले सो सदनभित्र पुस्तकालय, वाचनालय, धार्मिक स्थल, स्कुल आदिको रूपमा प्रयोग गर्दै आएकी छन् ।
