मेघराज रिष्मेली, टोकियो ।
जापानको ओसाकामा पूर्णबहादुर क्षेत्री मृत फेला परेका छन् भने ४० वर्षकी अर्की एक महिला अचेत अवस्थामा लडिरहेको फेला परेका छन् ।
जुलाई १२, २०२३ बुधबार बिहान ओसाका प्रिफेक्चरको इकेदा सहरमा रहेको इन्डियन/नेपाली रेस्टुरेन्टका मालिक क्षेत्री र अर्की एक महिला अचेत अवस्थामा भेटिएको जापानका सञ्चारमाध्यमले जनाएका हुन् ।
सञ्चारमाध्यमका अनुसार क्षेत्रीको मृत्यु भएको पुिष्ट भइसकेको छ भने अर्की महिलाको उपचार भइरहेको छ । घटनाबारे प्रहरीले थप अनुसन्धान बढाइरहेको जानकारी प्राप्त भएको छ ।
प्रहरीका अनुसार क्षेत्री जुलाई ११ का दिन घरबाट निस्किएका थिए । उनी घर नफर्किएकापछि खोजी गर्ने क्रममा परिवारले प्रहरीलाई खबर गरेका थिए । प्रहरीले खोजतलासको क्रममा रेस्टुरेन्टमा पुग्दा पसलको सटर बन्द गरी ताल्चा लगाइएको थियो ।
प्रहरीलाई उद्धृत गरी प्रकाशित समाचारका अनुसार मृतक क्षेत्री र अचेत भेटिएकी महिलालाई कुनै उल्लेखनीय चोटपटक लागेको छैन । साथै पसलमा तोडफोड भएको कुनै प्रमाण नभेटिएको प्रारम्भिक अनुसन्धानमा देखिएको छ ।
