काठमाडौँ । पछिल्लो समय बैदेसिक रोजगारका लागि श्रमस्वीकृति लिने नेपाली युवाहरूको सङ्ख्या बढ्दै गएको छ ।

बैदेसिक रोजगार विभागका अनुसार चालु आर्थिक वर्षको असार १६ गतेसम्म बैदेसिक रोजगारीमा जान श्रमस्वीकृति लिनेको सङ्ख्या करिब सात लाख ४० हजार रहेको छ । उक्त सङ्ख्या दिनैपिच्छे बढ्दै गएको विभागले जनाएको हो ।

अघिल्लो आर्थिक वर्षमा झन्डै छ लाख ३० हजार जनाले नेपालबाट बैदेसिक रोजगारीमा जान श्रमस्वीकृति लिएका थिए । विभागले आर्थिक वर्ष २०५०/५१ यता बैदेसिक रोजगारीमा जानेको तथ्याङ्क अद्यावधिक गर्दै आएकोमा चालु आर्थिक वर्षमा यसरी श्रम स्वीकृति लिनेको सङ्ख्या बढ्दो देखिएको जनाएको छ ।

नेपालबाट बैदेसिक रोजगारीमा जान श्रमस्वीकृति लिनेको सङ्ख्याले नयाँ रेकर्ड बनाएको बताइएको छ । चालु आर्थिक वर्षको ११ महिनामा झन्डै साढे सात लाख जनाले श्रम स्वीकृति लिएका हुन् ।

कुन देशमा बढी ?
बैदेसिक रोजगारीका लागि नेपालीहरू सबैभन्दा धेरै मलेसिया तथा खाडी मुलुक जाने गरेका छन् । चालु आर्थिक वर्षको असार १६ गतेसम्म बैदेसिक रोजगारीमा जान श्रमस्वीकृति लिनेको सङ्ख्या सात लाख ४० हजार पुगेको बैदेसिक रोजगार विभागका सूचना अधिकारी तथा निर्देशक गुरुदत्त सुवेदीले जानकारी दिनुभयो ।

उहाँका अनुसार पछिल्लो समय युरोप जानेको सङ्ख्या पनि बढ्दो रहेको र बैदेसिक रोजगार विभागबाट श्रमस्वीकृति लिएर क्रोएसिया, साइप्रस, फ्रान्स, पोल्यान्ड, रोमानिया जस्ता युरोपेली मुलुकमा नेपालीहरू जाने गरेका छन् ।

श्रमस्वीकृति लिएर प्रत्येक महिना कम्तीमा पनि ६० हजारभन्दा बढी युवाहरू बैदेसिक रोजगारीका लागि विभिन्न मुलुकमा पुग्ने गरेको निर्देशक सुवेदीले बताउनुभयो ।

उहाँका अनुसार गएको फागुनमा बैदेसिक रोजगारमा ६१ हजार आठ सय ४५ जना गएको देखिन्छ । यसमध्ये युरोप जानेको सङ्ख्या धेरै छ । चैतमा बैदेसिक रोजगारीका लागि ६१ हजार चार सय ७८ युवाले श्रम स्वीकृति लिएका थिए । यो नयाँ तथा पुन: श्रम स्वीकृति लिनेको सङ्ख्या हो ।

गत वैशाख महिनामा ५४ हजारभन्दा बढी युवा बाहिरिएका थिए । वैशाखमा विश्वका ९० ओटा देशमा ५४ हजार चार सय ५७ जना रोजगारीका लागि गएको विभागको तथ्याङ्कमा उल्लेख छ ।

असार महिना पुन: श्रमस्वीकृति लिएर २१ हजार १७ जना विदेशिएका छन् भने ३३ हजार चार सय ४० जनाले नयाँ श्रम स्वीकृति लिएर विदेशिएका छन् । बिदेसिनेमा ४९ हजार पाँच सय नौ पुरुष र चार हजार नौ सय ४८ महिला छन् ।

नेपालका लागि श्रमस्वीकृति पनि बढ्दै
त्यसैगरी, गएको दुई महिनामा नेपालमा काम गर्न झन्डै एक हजार चार सय विदेशी नागरिकले श्रम स्वीकृति लिएका श्रम तथा व्यवसायजन्य सुरक्षा विभागका निमित्त महानिर्देशक मणिनाथ गोपले जानकारी दिनुभयो ।

उहाँका अनुसार गएको वैशाख महिनामा नौ सय ७४ र जेठ महिनामा चार सय २२ जना गरी दुई महिनाको अवधिमा नेपालमा काम गर्नका लागि एक हजार तीन सय ९६ विदेशी नागरिकले नयाँ श्रम स्वीकृति लिएका थिए ।

त्यस्तै, गएको वैशाख र जेठ महिनामा चार सय ५८ विदेशी नागरिकले श्रमस्वीकृति नवीकरण गराएका थिए ।