काठमाडौँ । नेपालको सम्बन्धमा चीनको मुख्य चासो बेल्ट एन्ड रोड इनिसियटिभ (बिआरआई) रहेको उपप्रधान तथा गृहमन्त्री नारायणकाजी श्रेष्ठले दाबी गर्नुभएको छ ।
पाँचदिने चीनभ्रमण सकेर आज असार १७ गते शुक्रबार काठमाडौँ आएर सञ्चारमाध्यमलाई प्रतिक्रिया दिँदै उहाँले यस्तो दाबी गर्नुभएको हो ।
भ्रमणका क्रममा उपप्रधानमन्त्री श्रेष्ठ र चीनका उपप्रधानमन्त्री ली फङमाझ द्विपक्षीय भेटवार्तामा दुई देशबिचको विकास, व्यापार र लगानीका सम्भावनाको विषयमा सकारात्मक छलफल भएको बताए ।
चीन सरकारसँग सम्झौता भएको बिआरआईको कार्यान्वयनको विषयमा चीन सरकारले चासो राखेको भन्दै उहाँले नेपाल सरकारले बिआरआईमा २०७० मा नै सम्झौता गरेकाले कार्यन्वयनको मोडालिटी बनाएर प्रक्रिया टुङ्गो लगाउने बताए ।
उहाँले भन्नुभयो– ‘चीनको मुख्य चासो बिआरआई परियोजना रहेको पाएँ ।’
चीन भ्रमणका क्रममा दुई देशबिच व्यापार, लगानी, पर्यटन, कनेक्टिभिटीलगायत विषयमा छलफल भएको बताउँदै उहाँले त्यसबारे चीन सरकात्मक भएको उल्लेख गर्नुभयो ।
उहाँले चीनद्वारा नेपालमा विगतमा हुँदै आएको सहयोग बढाउन आफूले आग्रह गरेको जानकारी पनि दिनुभयो ।
व्यापारिक नाका खोल्ने र नेपाल–चीन सीमानाकामा आवातजावत सहज बनाउने विषयमा समेत सकारात्मक छलफल भएको उहाँको भनाइ छ ।
उपप्रधानमन्त्री श्रेष्ठले सिचुवान प्रान्तीय लगानी समूहसँग छलफल गरी नेपालमा लगानी वृद्धि गर्न आग्रह गरिएको र सिचुवान एयरलाइन्सका पदाधिकारीसँगको छलफलमा छेन्दु–काठमाडौँ रुटमा हवाई उडान वृद्धि गर्न तथा छेन्दुबाट पोखरा र भैरहवा विमानस्थलमा कमर्सियल उडान सुरू गर्न पनि आग्रह गरेको बताउनुभयो ।
भैरहवाभन्दा पनि सिचुवान एयरलाइन्स पोखरामा उडान भर्न तयार रहेको देखिएको उहाँको भनाइ थियो ।
उपप्रधानमन्त्री श्रेष्ठ सात सदस्यीय नेपाली प्रतिनिधिमण्डलको नेतृत्व गर्दै २०८० असार १३ गते बुधवार चीन भ्रमणमा गएका थिए ।
