काठमाडौं । नेपाल कम्युनिस्ट पार्टी (माले) ले पार्टी महासचिव सीपी मैनाली सवार कार दुर्घटना नियोजित भएको दाबी गरेको छ । नेकपा (माले) ले शुक्रबार एक विज्ञप्ति प्रकाशित गरी कार दुर्घटना नियोजित रुपमा गराइएको भन्दै छानबिनको माग गरेको छ ।
मालेका प्रवक्ता कुमाल बेलबासेद्वारा जारी विज्ञप्तिमा भनिएको छ, ‘यो दुर्घटना पार्टीको दृष्टिकोणमा अस्वभाविक र नियोजित देखिन्छ । हामी सरकारसँग उक्त दुर्घटनाको सत्य तथा त्यस अन्तरनिहीत दुर्नियत योजनाकोसमते छानबिन गरी सत्यतथ्य जनतासमक्ष ल्याउन र कुनियतजन्य योजनाकार र दोषिलाई अविलम्ब कानुनी कारबाही गर्न जोडदार माग गर्दछौं ।’
भाइको छोरीको विवाहमा गएर झापाबाट काठमाडौँ फर्कदै गर्दा महासचिव मैनाली विपी राजमार्गको सिन्धुली क्षेत्रमा दुर्घटनामा पर्नुभएको थियो । उहाँ सवार बा७च २१२० नम्बरको जिपलाई विपरीत दिशाबाट गइरहेको ना४च ७६८० नम्बरको भ्यानले ठक्कर दिएको थियो ।
दुर्घटनामा मैनालीका छोरा ३० वर्षीय सरोज, बुहारी पूजा ढुङ्गाना मैनाली, ५ वर्षीय नाति एन मैनाली र चालक रामप्रसाद पौडेल पनि घाइते भएका थिए । काठमाडौँको टोखास्थित ग्राण्डी अन्तर्राष्ट्रिय अस्पतालमा उपचाररत मैनाली खतरामुक्त रहेको अस्पताल स्रोतले जनाएको छ ।
मैनाली दुर्घटनामा परेको खबरले महामन्त्री सिंह दुःखी
नेकपा (माले) का महासचिव सिपी मैनाली गम्भीर घाइते
