काठमाडौँ । लेखक रतन भण्डारीले विदेशी शक्तिका अगाडि पटक पटक लम्पसार पर्ने नीतिका कारण हाम्रो मुलुकमा राष्ट्रघात हुँदै आएको बताउनुभएको छ ।
प्रगतिशील लेखक सङ्घको आयोजनामा २०८० असार ८ गते शुक्रबार प्रलेस कार्यालय बागबजारमा “नेपाल भारत सम्बन्ध र राष्ट्रियता” विषयक पैसट्ठिऔँ परिसंवादमा मन्तव्य राख्दै भण्डारीले सो धारणा राख्नुभएको हो ।
परिसंवाद कार्यक्रमलाई सम्बोधन गर्दै लेखक भण्डारीले भन्नुभयो– ‘ग्रेटर नेपालको नारामा मिठास छ, विशाल नेपालको निर्माणको हुन्छ भने त्यो स्वीकार्य विषय हो ।’
उहाँको भनाइ थियो– ‘जब जब गोर्खाल्यान्ण्डको आन्दोलन चर्कन्छ अनि मात्र किन ग्रेटर नेपालको ब्यानर लैनचौरमा देखिन्छ ? विशेष सिजनमा मात्र देखिने यस प्रकारका भावनात्मक नाराको कुनै औचित्य छैन ।
कथित सीमाविद्हरूका साथै भर्खरै नेपालका प्रधानमन्त्रीको भारत भ्रमणको सन्दर्भमा उठेको बङ्गलादेश मोडल घातक र राष्ट्रघाती भएको लेखक भण्डारीको धारणा थियो ।
लिम्पियाधुरा सीमानक्सालाई विषयान्तर गर्न बङ्गलादेश बाटोसँग कालापानी साट्ने कुरा स्वीकार्य हुनै नसक्ने उहाँको तर्क थियो ।
नेपाल भूपरिवेष्ठित राष्ट्र भएका कारण अन्तर्राष्ट्रिय कानुनअनुसार पनि पारवहन सुविधा पाउनुपर्ने उहाँले दाबी गर्नुभयो ।
‘कतिपय कथित सीमाविद्ले लिम्पियाधुराको नक्सालाई विषयान्तरण गर्ने, ढिलाइ गर्ने, ट्र्याकबाट हटाउने र अन्तत: ध्वस्त गर्ने कथित फोरडी रणनीति, राष्ट्रियताको सन्दर्भमा एकदम घातक छ’ उहाँको तर्क थियो ।
नेपाली राजनीतिमा शासन सत्ता टिकाइराख्न विदेशी शक्तिको अगाडि चाकडी गर्ने प्रवृत्ति राणा शासनको बेलादेखिसन् १९५० को कथित सन्धि, महाकाली सन्धि हुँदै अहिलेको सरकारसम्मले निरन्तरता दिएको लेखक भण्डारीले बताउनुभयो ।
वर्तमान प्रचण्ड सरकारको ऊर्जालगायतका क्षेत्रमा थुप्रै राष्ट्रघाती सम्झौताबाट पनि त्यो कुरा पुष्टि भएको उहाँको भनाइ थियो ।
प्रलेसका अध्यक्ष डा. मधुसूदन गिरीको अध्यक्षता तथा उपाध्यक्ष नमुना शर्माको सञ्चालनमा अगाडि बढेको कार्यक्रममा परिसंवाद कार्यक्रमका संयोजक समीर सिंहले विषयवस्तुमाथि प्रस्ट पार्नुभएको थियो ।
कार्यक्रममा डा. कृष्णराज अधिकारी, तेजविलास अधिकारी, मोहन कार्की, शेखर अर्याल, साधुराम नेपाल, केशु कार्कीलगायतले पूरक टिप्पणी गर्नुभएको थियो ।
परिसंवाद कार्यक्रममा भौतिक तथा भर्चुअल माध्यमबाट समेत देशविदेशमा उपस्थिति रहेको थियो ।
