भरतपुर । नेपालमा ब्रोइलर कुखुराको मासु अभाव हुने भएको छ ।
किसान कुखुरा पालन व्यवसायबाट पलायन हुने क्रम बढेसँगै देशभर मासुको अभाव भएको हो ।
पाल पोल्ट्री महासङ्द्धका उपाध्यक्ष टीकाराम पोखरेलका अनुसार चितवनका ९० प्रतिशत किसानले कुखुरा पाल्न छाडेका छन् ।
बैङ्कले किसानलाई ऋण नदिँदा किसानले चल्ला र दाना किनेर कुखुरा पाल्न सक्ने अवस्था नरहेको उपाध्यक्ष पोखरेल बताउनुभयो ।
उहाँले भन्नुभयो– ‘किसानले गरेको उत्पादनको मूल्य राम्रो छ तर किसानले चल्ला हाल्न सक्ने अवस्था छैन । तीनचार वर्ष घाटा खाएका किसान फेरि घाटामा परिन्छ कि भन्ने डरले कुखुरा पाल्न सकेका छैनन् ।’
बजारको मागअनुसारको उत्पादन नहुँदा देशभर कुखुराको मासुको अभाव भएको उहाँले जानकारी दिनुभयो ।
‘ह्याचारी र दाना उद्योगबाट किसानले एकदुई महिनाका लागि उधारो पाउने गर्थे’ उहाँले भन्नुभयो– ‘अहिले नगदबिना कारोबार हुनै छाड्यो । त्यसकारण पनि किसानले कुखुरा पाल्न सक्ने अवस्था छैन ।’
अहिले व्यावसायिक रूपमा स्थापना गरिएको ठूला फर्मले मात्र कुखुरा पालेको उपाध्यक्ष पोखरेल बताउनुभयो ।
उहाँले सरकारले किसानको मनोबल उच्च बनाउने योजना र कार्यक्रम ल्याउन नसके पोल्ट्री क्षेत्र थप धरासायी बन्ने बताउनुभयो ।
अहिले ब्रोइलर कुखुराको किसानको खोर मूल्य रु दुई सय ८० देखि तीन सय रहेको छ । बजारमा उपभोक्ताले किन्दा चार सय ८० देखि पाँच सयसम्म पर्ने गरेको छ । काठमाडौँ, पोखरालगायतका बजारमा ब्रोइलर कुखुरा खपत गर्ने चितवनलाई आफ्नै जिल्लाको उत्पादनले पुगिरहेको छैन । यहाँ पनि अन्य जिल्लाबाट कुखुरा ल्याउन थालिएको छ ।
भरतपुरको सिनर्जी मिट सप्लायर्सका सञ्चालक सुमन जोशी एक महिनादेखि कुखुराको अभवा भए पनि पछिल्लो एक सातदेखि झन् धेरै अभाव भएको बतानउनुभयो ।
उहाँले ब्रोइलर कुखुरा नपाउँदा आफूले बिहान पसल खोलेर बेलुका बन्द गर्नुपरेको बताउनुभयो ।
‘दैनिक रूपमा ग्राहक फर्किनुपरेको छ’ उहाँले भन्नुभयो– ‘होटल रेस्टुराँमा पनि मासु पुर्याउन धौ धौ भइरहेको छ ।’
उहाँले गर्मीको समयमा उत्पादन कम, कुखुराको वजन कम र मृत्युदर बढी हुने गरेको जानकारी दिनुभयो ।
नेपाल अण्डा उत्पादक सङ्घका अध्यक्ष शिवराम केसी अण्डा अभाव नभए पनि उत्पादनमा भने कमी आएको जानकारी दिनुभयो । (रासस)
