बुटवल । लुम्बिनीमा दातबापत प्राप्त भएको अपरिवर्तित मुद्रा साटिएको छ ।
लुम्बिनी विकास कोषको पहलकदमीमा दानबापत् सङ्कलित अपरिवर्तित देशको रु ५४ लाख २९ हजार बराबरको रकम नेपाल राष्ट्र बैङ्कमार्फत सटही गरेको हो ।
कोषका कोषाध्यक्ष सिद्धिचरण भट्टराईसहित पदाधिकारी र बोर्डको पहलमा वर्षौंदेखि सटही हुन नसकेको दानबापत्को अपरिवर्तित मुद्रा पहिलोपटक सटहीमा सफलता मिलेको छ ।
लुम्बिनी विकास कोष र राष्ट्र बैङ्ककबिच भएको सम्झौताअनुसार गत चैत २७ गते राष्ट्र बैङ्क सिद्धार्थनगर शाखालाई उक्त मुद्रा पठाइएको थियो । कोषले मुचुल्का उठाएर श्रीलङ्का, म्यानमार, भियतनाम, कम्बोडिया, बङ्गलादेशसहितका देशको मुद्रा सटहीका लागि राष्ट्र बैङ्क भैरहवा कार्यालयले सिआइएमबी बैङ्क सिङ्गापुर पठाएको कोषाध्यक्ष सिद्धिचरण भट्टराईले बताउनुभयो ।
उहाँले लुम्बिनीमा विदेशी नागरिकले पवित्र भावनाले प्रदान गरेको दान रकम नसाटिएर कागज बराबर भएकोमा पटक पटकको प्रयासपछि रकम सटही भएर आएको बताउनुभयो ।
नेपाल राष्ट्र बैङ्कको परिवत्र्य विदेशी मुद्राको सूचीमा नपरेका देशका पर्यटकले दानबापत् लुम्बिनीमा चढाएको रकम लामो समयदेखि सटही हुन नसकेकामा सिङ्गापुरस्थित सिआइबी बैङ्कबाट राष्ट्र बैङ्कको खातामा रु ५४ लाख २९ हजार सात सय ३१ प्राप्त भएको राष्ट्र बैङ्क सिद्धार्थनगरका उपनिर्देशक जीवनप्रकाश पाण्डेले बताउनुभयो ।
उहाँले केही मुद्रा पुरानो भएकाले सटही हुन नसकेको उल्लेख गर्दै पठाइएकामध्ये ९० प्रतिशत मुद्रा सटही भएर आएको बताउनुभयो ।
असार ४ गते सोमबार राष्ट्र बैङ्कको खातामा रकम आएको र अब लुम्बिनी विकास कोषमा रकम पठाइने पाण्डेले बताउनुभयो ।
गत चैत २२ गते कोषका तर्फबाट कोषाध्यक्ष ढुण्डिराज भट्टराई र राष्ट्र बैङ्क सिद्धार्थनगरका कायममुकायम निर्देशक शान्तिप्रसाद पाण्डेबिच मुद्रा सटही गर्न सम्झौतापत्रमा हस्ताक्षर भएको थियो । (रासस)
