ताम्लेजुङ बजार । ताप्लेजुङको सिदिङ्वा गाउँपालिका–६ मेहेलेमा आज असार ५ गते मङ्गलबार पहिरोले एक घर पुरिएको छ । पहिरोले मेहेलेको खुवास्थित तार्छदिप लिङ्देनको घर पुरिएको हो ।

उक्त घरमा लिङ्देन एक्लै बस्दै आउनुभएको थियो । पहिरो गएको बेला उहाँ घरबाहिर रहेका कारण मानवीय क्षति हुन नपाएको स्थानीय राजकुमार कँडेलले जानकारी दिनुभयो ।

यस्तै मेहेलेका ७८ वर्षीय वृखबहादुर लिम्बु आज पहिरोमा परी गम्भीर घाइते हुनुभएको छ । बाटोमा हिँड्दै गर्दा माथिबाट आएको पहिरोमा परी घाइते हुनुभएको हो । उहाँको स्थानीय स्वास्थ्य चौकीमा उपचार भइरहेको कँडेलले बताउनुभयो ।

निरन्तरको वर्षासँगै बाढी र पहिरो जाँदा मेहेले, खेवाङ र सुरुम्खीका बासिन्दा घर छाडेर सुरक्षित स्थानतर्फ लागेका छन् । उनीहरु अधिकांश स्थानीय निलगीरि माध्यमिक विद्यालयमा बस्दै आएका छन् । (रासस)