काठमाडौँ । काठमाडौँ, पोखरालगायत देशैभरिबाट विरोध भएपछि वितरक कम्पनीले नै भारतीय चलचित्र “आदिपुरुष” को प्रदर्शनमा रोक लगाएको छ ।
चलचित्रको नेपालमा वितरक कम्पनी ब्याङटेस फिल्म्सले २०८० असार ४ गते सोमबार एक विज्ञप्ति जारी गर्दै सो फिल्म प्रदर्शन नगर्ने जानकारी गराएको हो ।
कम्पनीका निर्देशक मनोज राठीले सिर्जित अवस्थाका कारण प्रदर्शन रोकिएको जानकारी दिनुभयो ।
‘काठमाडौँमा चलचित्र प्रदर्शन रोकिएपछि सिर्जित अवस्थाका कारण हामीले देशभर प्रदर्शन रोक्ने निर्णय लिएका हौँ’ वितरक राठीले भन्नुभयो ।
काठमाडौँ महानगरपालिका प्रमुख बालेन्द्र शाहले “जानकी भारतकी छोरी हुन्” भन्ने आशयको संवाद मूल संस्करणबाट नहटाएसम्म महानगरभित्र कुनै पनि भारतीय चलचित्र प्रदर्शनमा रोक लगाएपछि देशभर चलचित्रको प्रदर्शन रोकिएको थियो ।
काठमाडौँ महानगरपश्चात चलचित्र आदिपुरुषलाई पोखरा, धरान, वीरगञ्जलगायतका सहरमा समेत स्थानीय निकायका प्रमुखले प्रदर्शन नगर्न निर्देशन दिइसकेका थिए ।
सम्पूर्ण हिन्दी फिल्म रोकिएकोमा आपत्ति
यता, वितरक तथा प्रदर्शकको छाता संस्था नेपाल चलचित्र सङ्घले सम्पूर्ण भारतीय चलचित्रमा रोक लगाएको विषयमा असन्तुष्टि व्यक्त गरेको छ ।
यस सम्बन्धमा सङ्घका उपाध्यक्ष गोपालकाजी कायस्थले कानुनी प्रक्रियामार्फत उपचार खोज्ने जानकारी दिनुभयो ।
उहाँले भन्नुभयो– ‘यसरी सम्पूर्ण भारतीय चलचित्रको प्रदर्शनमा रोक लगाउनु उचित समाधान होइन । हामी यस विरुद्ध कानुनी प्रक्रियामा जान्छौँ र निकास खोज्छौँ ।’
