काठमाडौँ । प्युठानको पर्यटकीय केन्द्र स्वर्गद्वारी यात्राबाट फर्कने क्रममा हिँजो जेठ २९ गते साँझ भएको कार दुर्घटनाप्रति राष्ट्रिय जनमोर्चा प्युठानले दु:ख व्यक्त गरेको छ ।
जिल्ला अध्यक्ष ज्ञामुराम न्यौपानेको हस्ताक्षरमा २०८० जेठ ३० गते जारी शोकवक्तव्यमार्फत् दु:ख व्यक्त गरिएको हो ।
शोकवक्तव्यमा घटनामा ज्यान गुमाउने सबैमा भावपूर्ण श्रद्धाञ्जली तथा शोकसन्तप्त परिवारजनमा गहिरो समवेदना प्रकट गरिएको छ ।
यस्तो छ, शोकवक्तव्यको पूर्ण पाठ :
“प्युठानको पर्यटकीय केन्द्र स्वर्गद्वारी यात्राबाट फर्कने क्रममा हिँजो साँझ दस्खद कार दुर्घटनामा भएको छ । सो घटनामा परी ८ जना यात्रीको ज्यान गएको खबरले हामीलाई मर्माहत एबम् स्तब्ध बनाएको छ । घटनामा ज्यान गुमाउने सबैमा भावपूर्ण श्रद्धाञ्जली तथा शोकसन्तप्त परिवारजनमा गहिरो समवेदना प्रकट गर्दछौँ ।
दुर्घटना हुँदा उपल्लो घुम्तीबाट कार तल्लो घुम्तीमा खसेको थियो । गाडीमै च्यापिएका सबैलाई डोजरको प्रयोग गरी निकालिएको थियो । ज्यान गुमाउनेहरूमा जिपचालक दाङ लमही–५ का टङ्कबहादुर कुमाल, तुलसीपुर–१५ की सरिता शर्मा पोख्रेल, उनका छोराहरू विशाल र विकास पोख्रेल, लमही–७ का गोविन्द शाह, उनकी श्रीमती राधा शाह र उनका छोरा आदित्य साह, घोराही–१५ का बालक शिशिर खनालको दुर्घटनामा मृत्यु भएको थियो ।
स्वर्गद्वारी सडकखण्डमा स्तरीय सडक, सडक सुरक्षा प्रविधि र चालक सतर्कता, सूचक बोर्डको अभावमा पटक पटक यस्ता भयावह घटना दोहोरिने गरेका छन् । यस तर्फ तत्कालै ध्यान दिन हामी सम्बन्धित पक्षको ध्यानाकर्षण गराउन चाहन्छौँ ।”
