मेघराज रिष्मेली, टोकियो ।
राष्ट्रिय जनमोर्चा केन्द्रीय सदस्य एवम् समाजसेवी, राजनीतिक व्यक्तित्व बेदिलाल सापकोटा जापानमा सम्मानित हुनुभएको छ ।
राजमो गण्डकी प्रदेश समितिका सचिवसमेत रहनुभएका सापकोटालाई पत्नी यमकुमारी सापकोटासहित २०८० जेठ २३ गते मङ्गलबार टोकियोमा आयोजित एक कार्यक्रममाझ जापान नेपाली एकता समाजले सम्मान गरेको हो ।
कार्यक्रम टोकियोको गिन्जास्थित एभरेस्ट डाइनिङको हलमा गरिएको थियो।
सापकोटा दम्पति बागलुङ गलकोट नगरपालिका वडा नं. ९ का स्थायी वासिन्दा हुनुन्छ । बैदेसिक भ्रमणको सिलसिलामा अहिले जापान रहनुभएको अवसर पारेर राजनीति र समाजमा पुर्याउनुभएको योगदानका लागि उहाँलाई सम्मान गरिएको थियो।
कार्यक्रममा बेदिलाल सापकोटा, उहाँकी पत्नी यमकुमारी सापकोटा, एकता समाज कान्तोका अध्यक्ष नारायण कँडेल, कान्तो समितिकै कोषाध्यक्ष गोम बुढाथोकीसहित एकता समाजमा सम्बद्ध एवम् सापकोटाका शुभचिन्तकको बाक्लो उपस्थिति रहेको थियो ।
सो अवसरमा प्रमुख अतिथि सापकोटाले नेपालको समसामयिक राजनितिक घटनाक्रम, सामाजिक कामको बारेमा धारणा राख्नुभएको थियो ।
धारणा राख्ने क्रममा उहाँले नेपालबाट जापानलाई कर्मथलो गराउँदै आउनुभएका साथीहरू यहाँ व्यस्त समयको बाबजुद पनि सङ्गठनलाई महत्त्व दिइरहनुभएकोमा सबैलाई धन्यवाद दिनुभयो ।
आफू जापान आएर सम्मानित हुन पाउँदा र साथीहरू यो जमघटले आफूलाई उत्साहित रहेको उहाँको भनाइ थियो ।
कार्यक्रम जापान नेपाली एकता समाजका केन्द्रीय अध्यक्ष शालिकराम सापकोटाको अध्यक्षता तथा केन्द्रीय सचिव धनराज गौतमको सञ्चालन रहेको थियो ।
उपस्थित जनसमुदायलाई समाजका उपाध्यक्ष डण्ड सापकोटा केसीले स्वागत गर्नुभएको थियो भने कान्तो क्षेत्रीय समितिका सदस्य दयाराम सुवेदीको शुभकामना मन्तव्य राख्नु भएको थियो ।
