मेघराज रिष्मेली, जापान ।
जापान भ्रमणमा रहेका राष्ट्रिय जनमोर्चाका वैकल्पिक केन्द्रीय सदस्य एवम् समाजसेवी वेदीलाल सापकोटालाई जापान नेपाली एकता समाजले सम्मान गरेको छ ।
बागलुङको गलकोट नगरपालिका– ९ निवासी नेता सापकोटा र उहाँकी पत्नी यमकुमारीलाई समाजसेवामा पुर्याएको योगदानको कदर गर्दै नेपाली एकता समाजले सम्मान गरेको हो ।
टोकियोको गिन्जास्थित एभरेष्ट डाइनिङ हलमा आयोजित समारोहमा जापान नेपाली एकता समाजका केन्द्रीय अध्यक्ष शालिकराम सापकोटालगायत नेता कार्यकर्ताहरुले सापकोटा दम्पतीलाई सम्मान गर्नुभएको हो ।
सो अवसरमा नेता सापकोटाले देशको समसायिक राजनीतिबारे धारणा राख्दै राष्ट्रिय जनमोर्चाले खेलेको भूमिकाबारे स्पष्ट पार्नुभएको थियो ।
उहाँले नेपालबाट आएर जापानलाई कर्मथलो बनाउँदै आएका नेपालीहरुले व्यस्तताको बाबजुत पनि संगठित भएकोमा खुसी व्यक्त गर्नुभयो । जापान आएको अवसरमा आफू सम्मानित गरेकोमा धन्यवाद दिँदै साथीहरूको जमघट र उत्साह देख्दा हर्षित भएको सापकोटाले बताउनु भयो ।
कार्यक्रमको अध्यक्षता जापान नेपाली एकता समाजका केन्द्रीय अध्यक्ष शालिकराम सापकोटा, सञ्चालन केन्द्रीय सचिव धनराज गौतम र स्वागत उपाध्यक्ष डण्ड सापकोटा केसीले गर्नुभएको थियो ।
कार्यक्रममा जापान नेपाली एकता समाज कान्तोका अध्यक्ष नारायण कॅंडेल र कोषाध्यक्ष गोम बुढाथोकी लगायत समाजका सदस्यहरुको सहभागिता रहेको थियो ।
