काठमाडौं । राष्ट्रिय जनमोर्चाका अध्यक्ष चित्रबहादुर केसीले अंगीकृत नागरिकका सन्तानलाई वंशजको नागरिकता दिन संसदमा सर्वसम्मत निर्णय भएको भन्ने प्रधानमन्त्री पुष्पकमल दाहाल प्रचण्डको भनाईप्रति आपत्ति जनाउनुभएको छ ।
संसदमा नागरिकता विधेयक र प्रधानमन्त्रीको भारत भ्रमणबारे प्रश्न गर्दै केसीले राष्ट्रिय जनमोर्चाले संविधान बन्दादेखि नै जन्मको आधारमा नागरिकता पाएकाहरूको सन्तानलाई वंशजको नागरिकता दिन नहुनेमा आफ्नो पार्टीले जोड दिएको बताउनुभयो ।
उहाँले दलहरुलाई विदेशीले संघीयताको भारी बोकाएजस्तै अंगीकृतलाई वंशजको नागरिकता दिन बाध्य पारेको दाबी पनि गर्नुभयो ।
केसीले भन्नुभयो, ‘सम्मानीय सभामुख ज्यू, सम्मानीय प्रधानमन्त्रीले भन्नुभयो, अंगीकृत नागरिकलाई वंशज बनाउन संसदका सबै दल सहमत थिए भन्नुभयो। अब फेरि बोल्दाखेरि नेपाललाई संघीयता बोकाउँदा संसदका सबै दल सहमत थिए भन्नुहुन्छ कि भन्ने मलाई डर थियो। अंगीकृत नागरिकलाई वंशजको नागरिक बनाउनुपर्छ भन्ने तपाइँहरु त हो नि।’
उहाँले अगाडि भन्नुभयो, ‘राष्ट्रिय जनमोर्चाले संविधान बन्दाको बखतदेखि र त्यसपछि लगातार भनिराखेको छ कि वंशजको नागरिकता पाउनका लागि वंशजकै सन्तान हुनुपर्छ। यदी आमा वंशजको छ र बाउ पनि वंशजको छ भने त्यो मात्रै वंशजको नागरिक हुनसक्छ। त्यसविरुद्ध संविधान सभा र संसदमा राष्ट्रिय जनमोर्चाले दर्जनौं प्रस्ताव दर्ता गरेको छ।
यसरी अंगीकृत नागरिकका सन्तानलाई वंशज बनाएर तपाइँहरु भारतलाई जनसांख्यिक आक्रमण गर्न बल पुर्याइरहनुभएको छ। राष्ट्रिय जनमोर्चा अंगीकृत नागरिकका सन्तानलाई वंशजको नागरिकता दिने पक्षमा छैन।’
