टुकबहादुर रामदाम, ओमान ।
नेपाली राजदूतावास ओमानले जेठ १५ गते गणतन्त्र दिवस तथा सगरमाथा दिवस मनाएको छ । राजदूत निवासमा एक कार्यक्रमबीच दीप प्रज्वलन गरी गणतन्त्र तथा सगरमाथा दिवस मनाइएको हो ।

नेपाल र ओमानको राष्ट्रिय गानबाट शुरुआत भएको सो कार्यक्रममा ओमानका राष्ट्रिय संग्रहालयका महासचिव, परराष्ट्र मन्त्रालयका पदाधिकारीहरु, राजदूत तथा कूटनीतिक नियोगका पदाधिकारीहरु, पत्रकारहरु, सगरमाथा आरोही, उद्योग व्यवसायीहरु, ट्राभल एजेन्सहरु, नेपाली संघ सस्थाका प्रतिनिधिहरु लगायतको उपस्थिति थियो ।

सो अवसरमा ओमानका पहिलो सगरमाथा आरोही महिला नाजिरा अल हारथीले सगरमाथा आरोहण सम्बन्धी आफ्नो अनुभव र आकर्षक भिडिओ र तस्विरहरु सहित प्रस्तुतीकरण गर्नु भएको थियो ।

कार्यक्रममा पर्यटन पदयात्री फतिया अल जड्जालीले नेपाल भ्रमण, पत्रयात्रा, फाम ट्रिप आदिको अनुभवहरु सुनाउँदै नेपालको पर्यटन पवर्द्धनमा टेवा पुग्ने आकर्षक भिडिओहरु प्रस्तुत गर्नु भएको थियो ।

ओमान दैनिक अब्जरभरका पत्रका कबिर युसुफ, मस्कट दैनिकका पत्रकार अनिरबन राय र सोसल मिडिया अभियन्ता मुर्तदा अलावतीले आफ्नो अनुभवहरु सुनाउनुका साथै कबिर युसुफ र अनिरबन रायले नेपालमा फाम ट्रिपको अवसरमा बनाइएको नेपालको पर्यटन प्रवर्द्धन र वातावरण जोगाउन टेवा दिने सन्देश सहितको लघु वृत्तचित्र प्रस्तुत गर्नु भएको थियो ।

कार्यक्रममा राजदूत डोरनाथ अर्यालले पहिलो ओमानी महिला सगरमाथा आरोही नाजिरा अल हार्थी, धेरै पटक नेपाल भ्रमण गरेका र नेपालको पाँचवटा हिमालको पदयात्रा समेत गरेका फतिया अल जाड्जली, अरबिक, हिन्दी, मलायालम, अंग्रेजी, नेपाली समेत विभिन्न १५ भन्दा बढी भाषामा गीत गाउने प्रसिद्ध गायक हाइथाम मोहमद रफी, पूर्व सद्भावना राजदूत तथा सामाजिक अभियन्ता डा. चित्रा नारायणलाई धातुमा कुदेर नेपाली कलात्मक काठको आँखी झ्यालमा राखिएको प्रसंशापत्र प्रदान गर्नु भएको थियो ।

साथै ६ वर्ष ११ महिनाको उमेरमा सगरमाथा आधार शिविरमा पुगेका अल ग्रोब्रा, भारतीय स्कूलमा अध्यनरत विद्यार्थी अक्षज उडिवाललाई प्रसंशापत्र प्रदान गरी सम्मान गरिएको थियो ।

उक्त कार्यक्रममा बोल्दै राजदूत अर्यालले नेपालको आकर्षक पर्यटन गन्तब्यहरु तथा व्यापार र लगानीका अवसरहरु बारेमा प्रकाश पार्नु भएको थियो ।

अर्यालले विश्वव्यापी तापक्रम वृद्धिले हिमालहरुलाई पारेको असर बारेमा बताउँदै हिमालहरु आँखाको लागि मनमोहक दृष्य र स्वच्छ खानेपानीको श्रोत मात्र नभएर समुद्रदेखि हिमालसम्मको वातावरणीय सन्तुलन कायम गर्न उल्लेख्य योगदान रहेको विषयमा धारणा राख्दै हिमालहरु संसारको ताज र सबै मानवजातिको सम्पत्ति भएको बताउनु भयो ।

नेपाली राजदूतावासको तर्फबाट कार्यक्रममा पर्यटन प्रवर्द्धनात्मक वृत्तचित्र प्रस्तुत गरिएको थियो । साथै उपस्थित पाहुनाहरुलाई रात्रीभोजको आयोजना गरिएको थियो । कार्यक्रममा सगरमाथा समूह ओमानको सहयोगमा उपस्थित सबै विदेशी पाहुनाहरुलाई फ्रेममा राखिएको सगरमाथाको सुन्दर तस्विर उपहारस्वरुप प्रदान गरिएको थियो ।

उक्त कार्यक्रम नेपाली राजदूतावासको आयोजना तथा नेपाल पर्यटन बोर्ड र ओमानस्थित नेपाली सोसल क्लब, सगरमाथा समूह लगायत सबै नेपाली संघ संस्थाहरुको सहयोगमा गरिएको थियो ।

कार्यक्रमको सञ्चालन राजदूतावासका श्रम सहचारी गोबिन्दप्रसाद आचार्य र तृतीय सचिव कविता खनालले गर्नु भएको थियो ।

विहान गणतन्त्र दिवसको अवसरमा राजदूत निवासमा एक कार्यक्रमको आयोजना गरिएको थियो । राजदूत अर्यालबाट झण्डोत्तलन गरेर कार्यक्रमको शुरुआत गरिएको थियो । सो अवसरमा राजदूत अर्याल र श्रम सहचारी गोविन्दप्रसाद आचार्यले गणतन्त्र दिवसको महत्व र ऐतिहासिक पृष्ठभूमि सम्बन्धमा प्रकाश पार्नु भएको थियो ।