नेपालगञ्ज । बाँकेको नरैनापुर गाउँपालिकामा गौहत्या प्रमाणित भए एक वर्षसम्म सम्बन्धित व्यक्तिलाई पालिकाबाट प्रदान गरिने सेवा उपलब्ध नगराइने भएको छ ।
२०८० जेठ १२ गते शुक्रबार बसेको गाउँकार्यपालिका बैठकले सो निर्णय गरेको हो ।
पालिका अध्यक्ष इश्तियाक अहमद शाहले अधर्मी, अमानवीय कार्य गर्ने अपराधी तत्त्वले एकपछि अर्को गर्दै नरैनापुरको सद्भावलाई खलल पुर्याउन प्रत्यक्ष र अप्रत्यक्ष रूपमा चलखेल गरिरहेको बताउँदै गौहत्या जस्तो जघन्य अपराधले गाँउपालिकालाई मर्माहत बनाएको बताउनुभयो ।
अध्यक्ष शाहले सर्वप्राणी रक्षार्थ लाग्न सबैसँग अपिल गर्दै स्थानीय सरकार राष्ट्रिय जनावरको रूपमा रहेको गाईको विषयमा गम्भीर रहेकाले आपराधिक कार्यलाई जाति, धर्मसँग नजोडी मानवीय नाताले अपराध नियन्त्रण गर्नतर्फ लाग्न सम्बन्धित सबैसँग अपिल गर्नुभयो ।
गौहत्यामा संलग्नको पहिचान गरी कडाभन्दा कडा कारबाही गर्न र आगामी दिनमा यस्ता घटना दोहोरिन नदिन भन्दै सो निर्णय गरिएको प्रमुख प्रशासकीय अधिकृत मणिराम खरालले जानकारी दिनुभयो ।
बैठकले गौहत्या गर्ने व्यक्तिको सम्बन्धमा सूचना दिने सूचकलाई हत्यारा प्रमाणित भए १५ हजार रुपियाँ उपलब्ध गराउने निर्णय गर्नुका साथै गौहत्या नियन्त्रण गर्न सम्बन्धित सुरक्षाकर्मीलाई पालिकाले अनुरोध गर्नुका साथै जनचेतना कार्यक्रम सञ्चालन गर्ने निर्णय गरिएको पनि बताउनुभयो ।
