काठमाडौं । आठ जनाको ज्यान जानेगरी भएको टीकापुर काण्डमा दोषी ठहर रेशम चौधरीलाई रिहा गर्न सरकारले प्रक्रिाय सुरु गरेको छ । डिल्लीबजार कारागारमा रहेका नागरिक उन्मुक्ति पार्टीका संरक्षक चौधरीलाई जेठ १५ गते आम माफी दिन सरकारले राष्ट्रपति समक्ष सिफारिस गरेको हो ।
५ वर्ष २ महिना कैद भुक्तान गरिरहेका पूर्वसांसद चौधरीलाई गणतन्त्र दिवसको अवसर पारेर राष्ट्रपतिबाट आम माफी घोषणा गर्न लागिएको हो।
रेशमको माफी मिनाहाका लागि गृह मन्त्रालयमा कारागारले असल चालचलनको व्यहोरासहित निवेदन पठाएको थियो।
असल चालचलनका आधारमा सिमित कारागार ब्यतित गरेका व्यक्तिलाई सरकारको सिफारिसमा राष्ट्रपतिले आममाफी दिने प्रचलन छ ।
२०७२ भदौ ७ गते हिंसात्मक आन्दोलन हुादा टीकापुरमा ८ प्रहरी र एक नाबालक मारिएका थिए ।
प्रहरी वरिष्ठ उपरीक्षक (एसएसपी) लक्ष्मण न्यौपाने, प्रहरी निरीक्षकद्वय बलराम विष्ट र केशव बोहरा, हवल्दार श्यामबहादुर खड्का, प्रहरी जवान लोकेन्द्रबहादुर चन्द, सशस्त्र प्रहरी वरिष्ठ हवल्दार ललित साउद, सहायक हवल्दार रामबिहारी चौधरी र प्रहरी जवान जनक नेगी तथा डेढ वर्षीय बालक टेकबहादुर साउद मारिए।
सो हत्याकाण्डका मुख्य योजनाकार रेशम चौधरी रहेको किटानी जाहेरी पर्यो।
घटनालगत्तै फरार रहेका चौधरीले भूमिगत अवस्थामै २०७४ को प्रतिनिधिसभा निर्वाचनमा कैलाली १ बाट चुनाव जिते। तर, त्यसै वर्षको फागुनमा उनले आत्मसमर्पण गरेका थिए।
२०७५ फागुन १२ मा कैलाली जिल्ला अदालतले चौधरीसहित ११ जनालाई जन्मकैदको फैसला सुनायो।
२०७७ पुस ३ गते उच्च अदालत दिपायलले पनि रेशम चौधरीसहित ८ जनालाई जन्मकैदको फैसला सुनायो। त्यही फैसलालाई २०८० जेठ २ गते सर्वोच्च अदालतले पनि सदर गरेको हो।
सर्वोच्चको फैसलाअनुसार रेशम २०९४ सम्म डिल्लीबजार कारागारमा बस्नुपर्नेछ। तर, राष्ट्रपतिमार्फत् आगामी जेठ १५ गते नै उनको रिहाइको तयारी भएको हो।
