धुलिखेल । राष्ट्रिय जनमोर्चाका केन्द्रीय सचिव हिमलाल पुरीले अमेरिकी साम्राज्यवादको नयाँ कठपुतली दलको रूपमा कथित राष्ट्रिय स्वतन्त्र पार्टी गठन भएको दाबी गर्नुभएको छ ।
काभ्रेको धुलिखेलमा २०८० जेठ ११ गते बिहीबार मेची–महकाली अभियानले आयोजना गरेको सभालाई सम्बोधन गर्दै उहाँले यस्तो दाबी गर्नुभएको हो ।
‘सत्तासिन ठुला राजनीतिक पार्टीहरूले यसअघि अमेरिकी साम्राज्यवादको हितसाधन गर्दै आएका थिए’ उहाँले भन्नुभयो– ‘अब अमेरिकाले नयाँ कठपुतली राजनीतिक दल पाएको छ† त्यो हो, कथित राष्ट्रिय स्वतन्त्र पार्टी ।’
सम्बोधनको क्रममा उहाँले कथित रास्वपाको जन्म नै अमेरिकी स्वार्थमा भएको बताउनुभयो ।
‘तपाईंहामी सबैलाई थाहा छ, राष्ट्रिय स्वतन्त्र पार्टीको जन्म अमेरिकी स्वार्थमा भएको थियो’ उहाँले गत चुनावको सन्दर्भ जोड्दै भन्नुभयो– ‘गत चुनावमा राष्ट्रिय स्वतन्त्र पार्टीको पक्षमा नेपालस्थित अमेरिकी दूतावास सक्रिय भएको, चर्चहरूले रास्वपाको पक्षमा मतदान गर्न परिपत्र नै गरेको, अमेरिकाको भ्वाइस अफ अमेरिकाले रास्वपाको प्रचार गरेको तथ्यबाट उक्त पार्टी अमेरिकाको नयाँ कठपुतली दल भएकोमा कुनै शङ्का रहन्न ।’
उहाँले चीन घेर्न नेपाली भूमिको सामरिक महŒव रहेकाले पछिल्लो समयमा अमेरिकी साम्राज्यवादले नेपालमा माइक्रो म्यानेजमेन्ट गरिरहेको बताउनुभयो ।
‘कतिपयलाई लाग्ला, नेपाल यति सानो देश छ† त्यसमाथि गरिब पनि छ† अमेरिकाले यस्तो देशलाई किन महत्त्व देला ?’ सचिव पुरीको भनाइ थियो– ‘चीन घेर्न हिन्दप्रसान्त रणनीति अगाडि सारिरहेको अमेरिकाका लागि नेपाल सामरिक हिसाबले महत्त्वपूर्ण भूमि हो । त्यसकारण अमेरिकाले नेपाललाई आधार बनाएर चीनको विरुद्ध खेल्न चाहान्छ ।’
उहाँले नेपाली जनताले समयमै अमेरिकी साम्राज्यवादको बारेमा प्रष्ट धारणा कायम गर्न नसके देश अफगानिस्तान, इराक र युक्रेन बन्नेतर्फ सचेत गराउनुभयो ।
२०७८ सालमा संसद्बाट जबर्जस्ती एमसिसी पारित भएसँगै नेपालको परराष्ट्रनीति अमेरिकापरीत बन्दै गएको बताउँदै उहाँले अमेरिकाले नेपाललाई आफ्नो हितमा खरानी पार्न पछि नपर्ने बताउनुभयो ।
उहाँले थप्नुभयो– ‘विषयको यस खालको गम्भीरतालाई बुझेर नै राष्ट्रिय जनमोर्चाले साङ्केतिक रूपमा अहिले मेची–महाकाली अभियान चलाइएको हो ।’
उहाँले अमेरिकी साम्राज्यवादको भण्डाफोर अभियान लगातार अगाडि बढ्ने बताउनुभयो ।
सुजन ज्ञवालीको सञ्चालनमा अघि बढेको उक्त कार्यक्रममा सहभागीलाई राजमो काभ्रेका अध्यक्ष सुवर्णविक्रम थापाले स्वागत मन्तव्य राख्नुभएको थियो ।
