काठमाडौं । बागलुङको ढोरपाटन नगरपालिकाको मेयर देवकुमार नेपालीलाई सरकारले विदेश जान प्रतिबन्ध लगाएको छ ।
सहकारीको रकम हिनामिना गरेको आरोप लागेका मेयर नेपाली विदेश भाग्ने सम्भावना भएपछि सरकारले प्रतिबन्ध लगाएको हो । उनी केही दिनदेखि सम्पर्कविहीन छन् ।
नेपाली अध्यक्ष रहेको इमेज बचत तथा ऋण सहकारी संस्थाले गत वैशाख ६ गते सबै कारोबार बन्द भएको सूचना जारी गरेको थियो । सो सहकारीमा निक्षेपकर्ताको करिब ४० करोड रुपैयाँ बचत रहेको छ ।
बागलुङ बजारमा मुख्य कार्यालय खोलेर ढोरपाटन नगरपालिका–१, पोखरा र बागलुङ नगरपालिका–२ मा पनि शाखा कार्यालय सञ्चालन गरिरहेको उक्त सहकारीबाट एकै पटक धेरै निक्षेपकर्ताले पैसा फिर्ता माग्न थालेपछि अध्यक्ष नेपाली सम्पर्कविहीन भएका हुन् ।
सहकारीले गत वैशाखदेखि नै तरलता अभाव कारण देखाउँदै कारोबार रोकेको थियो। त्यसपछ गत वैशाखदेखि नै बचतकर्ता धर्नामा बसेका थिए।
यो सहकारीले १८ प्रतिशतसम्म ब्याज दिने प्रलोभन निक्षेपकर्तालाई दिएको खुलेको छ। कतिपयले त्यहीकारण बैंकमा जम्मा गरेको रकम पनि झिकेर सहकारीमा हालेका थिए।
बागलुङकी प्रमुख जिल्ला अधिकारी रोशनी कुमारी श्रेष्ठले इमेज सहकारीका निक्षेपकर्ताहरु अहिले धमाधम उजुरी लिएर आइरहेको बताउनुभयो । सहकारीका सेयर सदस्य र निक्षेपकर्ताले मेयर नेपाली भागेको भन्दै निवेदन दिएको उहाँले जानकारी दिनुभयो ।
२०७४ मा नेकपा माओवादी केन्द्रले टिकट नदिएपछि एमालेमा प्रवेश गरेर नेपाली ढोरपाटन नगरपालिकाको मेयरमा निर्वाचित भएका थिए। अघिल्लो वर्षको वैशाख ३१ गते उनी एमालेबाटै दोस्रो कार्यकालका लागि मेयरमा निर्वाचित भएका थिए।
तीन दिनदेखि गायब भएका अध्यक्ष नेपालीलाई प्रहरीले खोजिरहेको छ। उनको अत्तोपत्तो नभएपछि देशबाहिर जान नदिने गरी गृहमन्त्रालयले पत्र काटेको छ। अध्यक्ष नेपालीलाई गृहमन्त्रालयले आइतारदेखि विदेशको यात्रा अनुमतिमा रोक लगाएको छ।
