काठमाडौं । प्रहरीले नक्कली भुटानी शरणार्थी प्रकरणको अनुसन्धान प्रतिवेदन सरकारी वकिल कार्यलयमा बुझाउने तयारी गरेको छ ।
हिजै प्रतिवेदन बुझाउने तयारी भएपनि नभ्याएकाले आज बुझाउन लागिएको नेपाल प्रहरीका प्रवक्ता डीआईजी कुवेर कडायतले बताउनुभयो ।
नक्कली भुटानी शरणार्थी प्रकरणमा सबैलाई एउटै मुद्दा नलाग्ने र फरक फरक मुद्दा आकर्षित हुने उहाँले जानकारी दिनुभयो ।
यस प्रकरणका दोषीलाई राज्यद्रोह, ठगी, संगठित अपराध, अख्तियारको दुरुपयोग, सम्पत्ति शुद्धीकरण आदि मुद्दा आकर्षित हुने पनि कडायतको भनाई छ।
‘नक्कली भुटानी शरणार्थी प्रकरणमा कतिपय व्यक्तिलाई नियन्त्रणमा लिएका छौं, कतिपय फरार छन् । तर सबैलाई एकै किसिमले ट्रिट गर्ने हो । पहिलो कुरा त यथेष्ट प्रमाणबिना पक्राउ पुर्जी नै जारी हुन्न’ उहाँले भन्नुभयो, ‘व्यक्तिको संलग्नता र भूमिकाका आधारमा कसलाई कुन मुद्दा चलाउने भनी मागदाबी गरेका छौं । दोषी सबै अनुसन्धानको दायरामा आउँछन् ।’
नेपाल प्रहरी कसैलाई जोगाउन वा कसैलाई फसाउन नलागेको कडायतको भनाई छ ।
कसैले बयानमा बोल्न पनि सक्ने र नबोल्न पनि सक्ने भन्दै प्रहरीले प्रमाण जुटाएको उहाँले बताउनुभयो । तर अहिले अनुसन्धान जारी नै रहेकाले धेरै कुरा खुलाउन नमिल्ने पनि उहाँले बताउनुभयो ।
सरकारी वकिलको कार्यालयमा प्रतिवेदन बुझाएपछि पनि अनुसन्धान नरोकिने प्रहरी प्रवक्ता कडायतले जानकारी दिनुभयो ।
‘हालसम्म १६ जना नियन्त्रणमा छन्, अरु थुप्रै फरार छन् । हामीले अनुसन्धानका लागि ६० दिन कानुनले तोकेको छ । सरकारी वकिललाई प्रतिवेदन बुझाएपछि पनि अनुसन्धान रोकिँदैन’ उहाँले भन्नुभयो, ‘हामी यो वा ऊ व्यक्ति भन्दा पनि किटानी उजुरीका आधारमा प्रमाण जुटाउने काममा लाग्छौं ।’
नेपाली नागरिकलाई नक्कली भुटानी शरणार्थी बनाएर अमेरिका पठाइदिने भन्दै लाखौँ ठगी गरेको आरोपमा पूर्वउप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँणसमेत अहिलेसम्म १६ जना पक्राउ परिसकेका छन्।
नेपाल सरकारका सचिव टेकनारायण पाण्डे, तत्कालीन गृहमन्त्री रामबहादुर थापा बादलका सुरक्षा सल्लाहकार डा इन्द्रजित राई, खाँणका निजी सचिव नरेन्द्र केसी, नेपाली कांग्रेसका पूर्व सांसद आङटावा शेर्पा, सन्देश शर्मा, टोपबहादुरका छोरा सन्दीप, रामशरण केसी, गोविन्द चौधरी, सागर राई, टंकबहादुर गुरुङ, केशव दुलाल र सानु भण्डारी पक्राउ परिसकेका छन्।
यस्तै, कांग्रेसका पूर्वसांसद आङटावा शेर्पाले आत्मसमर्पण गरेका थिए। पक्राउ पुर्जी जारी गरिएका अन्य दुईजना फरार छन्।
