बाँके । राष्ट्रिय जनमोर्चाका नेता गौरीलाल कार्की एवं महिला नेतृ कमला खड्काले दिवंगत आमाको स्मृतिमा स्थानीय विद्यालयमा अक्षयकोष खडा गर्नुभएको छ । आमा धना कार्कीको निधन भएको १३ औँ दिनको तिथिमा आयोजित श्रद्धाञ्जली कार्यक्रममा उहाँहरुले सो घोषणा गर्नुभएको हो ।
बुबा गज कार्की र दिवंगत आमा धना कार्की दुवै जनाको संयुक्त नाममा कनका सुन्दरी गाउँ पालिका–७ रानिसैनमा रहेको श्री मालिका माध्यमिक विद्यालयमा १ लाख ११ हजार १११ रुपैयाँ राशीको अक्षय कोष स्थापना गर्ने निर्णय गरिएको कार्कीले बताउनुभयो ।
सो रकमबाट प्रत्येक वर्ष प्राप्त हुने ब्याज विद्यालयमा एसईई परीक्षामा उत्कृष्ट अंक ल्याउने छात्रा वा छात्रलाई ‘गजधना’ पुरस्कार स्वरुप प्रदान गरिनेछ ।
आगामी २०७७ साल वैशाख २२ गते हुने विद्यालयको वार्षिकोत्सव तथा अभिभावक भेलामा रकम हस्तान्तरण गरिने कार्कीले जानकारी दिनुभयो ।
राष्ट्रिय जनमोर्चा बाँकेद्वारा कार्की निवासमा आयोजित शोकस्मृति कार्यक्रममा अखिल नेपाल सुकुम्बासी संघका अध्यक्ष तुल्सीराम सापकोटा, अखिल नेपाल जनजाति सम्मेलनका महासचिव रामबहादुर बुढालगायत नेताहरुले आमा धनकलाको स्मरण गर्नुभएको थियो ।
कार्यक्रमको अध्यक्षता राजमो बाँकेका अध्यक्ष भिमप्रसाद देवकोटा र सञ्चालन रक्तिम सांस्कृतिक अभियान केन्द्रीय उपाध्यक्ष मानबहादुर भण्डारीले गर्नुभएको थियो ।
