बागलुङ बजार । नेकपा (मसाल) का महामन्त्री मोहनविक्रम सिंहले चीनलाई साइजमा ल्याउनका लागि अमेरिकी साम्राज्यवादले नेपाली भूमि प्रयोग गर्न खोजेको बताउनुभएको छ ।
प्रगतिशील पत्रकार सङ्घ बागलुङद्वारा २०८० जेठ ६ गते शनिबार बागलुङ बजारमा आयोजित पत्रकार सम्मेलनमा पार्टीको धारणा राख्दै महामन्त्री सिंहले यस्तो विश्लेषण अगाडि सार्नुभएको हो ।
‘अहिले अमेरिकाको मुख्य प्रतिस्पर्धा चीनसँग छ । त्यसले गर्दा उसले चीनलाई साइजमा राख्न नेपालको भूमि प्रयोग गर्न खोजिरहेको छ’ उहाँले भन्नुभयो– ‘यहाँको अस्थिरतामा खेलेर नयाँ दलमार्फत त्यो स्वार्थ पूरा गर्ने तयारीमा अमेरिका रहेको देखिन्छ ।’
महामन्त्री सिंहले चीनलाई घेराबन्दी गर्नकै लागि अमेरिकी साम्राज्यवादले हिन्दप्रसान्त रणनीति अगाडि सारेको र त्यसको अर्थनीतिको रूपमा एमसिसी अगाडि सारिएको तर्क गर्नुभयो ।
‘अमेरिकाले जुन हिन्दप्रसान्त रणनीति अगाडि सारेको छ, त्यो चीनलाई घेराबन्दीमा पार्नका लागि हो’ उहाँले भन्नुभयो– ‘एमसिसी हिन्दप्रसान्त रणनीतिकै अर्थनीति थियो । त्यसलाई जबर्जस्ती पारित गर्नमा अमेरिकाले सफलता प्राप्त गरिसकेको छ । ठुला दलहरूले यस मामिलामा राष्ट्रघात गरिसकेका छन् ।’
उहाँले एसपिपीसमेत पारित गरेर नेपाली र अमेरिकी सैनिकको चीनसित भिडन्त गराउने योजनामा अमेरिका रहेको दाबीसमेत गर्नुभयो ।
हस्तक्षेप गर्न आफ्नै पार्टी
महामन्त्री सिंहले अमेरिकी साम्राज्यवादले राजनीतिक पार्टी नै खोलेर नेपालमा हस्तक्षेप गर्न आइपुगेको दाबी गर्नुभयो ।
उहाँले विगतमा यहाँका दलका नेताहरूलाई आफ्रअनुकूल प्रयोग गर्दै आएकोमा अहिले पार्टी नै स्थापना गरेर लागेको भनाइ राख्नुभयो ।
तपाईंले रास्वपालाई भन्न खोज्नुभएको हो भन्ने प्रश्नमा महामन्त्री सिंहले भन्नुभयो– ‘रास्वपाको निर्माण र उसको विकासमा अमेरिकाको लगानी छ । अमेरिकाले आफ्नो स्रोतसाधनको प्रयोग गरेर आफूअनुकूल काम गर्नका लागि राजनीतिक दलमा लगानी गरेको हो ।’
रास्वपाको पछिल्लो चुनावी सफलताको सन्दर्भमा उहाँले जनमतले सधैँ सही फैसला नगर्ने र अहिले रास्वपाले पाएको जनमत पनि त्यस्तै कमजोरीको परिणाम भएको विश्लेषण गर्नुभयो ।
‘सधैँ जनमतले सही निर्णय गर्दैन । अहिले रास्वपाले पाएको मत भनेको अमेरिकाले आफ्नो स्वार्थअनुकूल प्रयोग गर्नका लागि निर्माण गरिदिएको हो’ उहाँले भन्नुभयो– ‘अराजकता मच्चाएर आफ्नोअनुकूल निर्णय गराउन अमेरिकाले दल नै खोलेर अगाडि बढेको छ ।’
देश गम्भीर सङ्कटतर्फ
उहाँले अहिले देश सामान्य अवस्थामा नरहेको उल्लेख दाबी गर्नुभयो ।
‘देश अहिले गम्भीर सङ्कटमा छ । गणतन्त्र, धर्म निरपेक्षतालगायतका उपलब्धि जोखिममा परेका छन्’ उहाँको भनाइ थियो– ‘प्रतिगमनकारी अराजकता फैलाएर जनआन्दोलनबाट प्राप्त उपलब्धिलाई समाप्त पार्ने दाउमा छन् ।’
उहाँले वर्तमान सरकारको असफलताबाट प्रतिगामीहरूले फाइदा उठाउन खोजेको पनि बताउनुभयो ।
‘अहिल विश्व अर्थतन्त्र आर्थिक मन्दीमा छ । नेपाल पनि क्रमश: त्यसै दिशातर्पm गइरहेको छ’ उहाँले भन्नुभयो– ‘अहिले नक्कली भुटानी शरणार्थी प्रकरणले जनताको असन्तुष्टि बढ्दै गइरहेको छ । यस्सको फाइदा प्रतिगामीहरू उठाउन चाहन्छन् ।’
महामन्त्री सिंहले सङ्घीयताका कारण देशको राष्ट्रियता, सार्वभौमिकता र अखण्डताका साथै आर्थिक रूपमा समेत अप्ठ्यारो परिस्थितिमा पारिरहेकाले त्यसलाई तत्कालै खारेज गर्नुपर्ने आवश्यकतामाथि जोड दिनुभयो ।
एमाले प्रतिगामी भूमिकामा
उहाँले आफूलाई कम्युनिस्ट बताउने एमाले नै यतिखेर प्रतिगमनकारी कित्तामा गएको बताउनुभयो ।
‘एमालेको साँठगाँठ अहिले प्रतिगामीसँग छ’ महामन्त्री सिंहले भन्नुभयो– ‘हिन्दु धर्मको आडमा राजा ल्याउन चाहनेहरूलाई अहिले भारत सरकार तथा आदित्यनाथ योगीहरूको साथ रहेको छ । उता, इसाईकरण गर्दै अमेरिकाले आफ्नो हस्तक्षेप बढाइरहेको छ ।’
उहाँले एमालेले तिनै प्रतिगामी, पुनरुत्थानवादी र भारतीय साम्राज्यवादसँग साँठगाँठ गरिरहेको बताउनुभयो ।
सो अवसरमा वामपन्थी नेता आनन्द शर्मा र राष्ट्रिय जनमोर्चाका केन्द्रीय सदस्य तथा बागलुङ जिल्ला अध्यक्ष राजेन्द्र ढुङ्गानासमेतको उपस्थिति रहेको थियो ।
कार्यक्रमको सहजीकरण प्रगतिशील पत्रकार सङ्घका सचिव ताराप्रसाद शर्माले गर्नुभएको थियो ।
वामपन्थी दलका नेतासँग भेटघाट
महामन्त्री सिंहले सोही दिन बागलुङका क्रियाशील प्रमुख वामपन्थी पार्टीका जिल्ला नेतृत्वसँग भेटघाट गर्नुभएको थियो ।
सो अवसरमा उहाँले नेकपा (एमाले) का जिल्ला अध्यक्ष हीराबहादुर केसी, नेकपा (माओवादी केन्द्र) का जिल्ला अध्यक्ष राजीव घिमिरे, नेकपा (एकीकृत समाजवादी) का सचिव भरत पुरी र जनता समाजवादी पार्टीका प्रदेश सदस्य कृष्णप्रसाद शर्मासँग छुट्टाछुट्टै भेटघाट गर्नुभएको थियो ।
‘भेटमा देशमा एकातिर प्रतिगामी, अर्कातिर अमेरिकी साम्राज्यवादी हस्तक्षेप बढ्दै गएकोबारेमा छलफल भयो’ राजमो केन्द्रीय सदस्य राजेन्द्र ढुङ्गानाले त्यसबारे जानकारी दिनुभयो ।
उहाँका अनुसार भेटमा देशको राष्ट्रियता र प्राप्त राजनीतिक उपलब्धिको रक्षाका लागि सबै दल मिलेर जाने विषयमा साझा धारणा कायम भएको थियो ।
