काठमाडौं । प्रधानमन्त्री पुष्पकमल दाहालले पूर्वलडाकुको शिविरमा भ्रष्टाचार छानबिन गरी दोषी देखिए जेल जान तयार रहेको बताउनुभएको छ ।

प्रतिनिधि सभाको बिहीवारको बैठकमा प्रतिनिधि सभा सदस्य ज्ञानबहादुर साहीकोे प्रश्नको जवाफ दिँदै प्रधानमन्त्री दाहालल यस्तो बताउनुभएको हो । उहाँले पूर्वलडाकुको शिविरमा भ्रष्टाचार गरेको भन्ने आरोप कपोकल्पित र पूर्वाग्रही भएको जिकिर गर्नुभयो । उहाँले पूर्व लडाकुको शिविरमा भ्रष्टाचार भएको विषयमा कसैले दिएको उजुरीमा दोषी देखिए आफू जेल जान समेत तयार रहेको उल्लेख गर्नुभयो।

उहाँले पूर्वलडाकु शिविरको भौतिक पूर्वाधार र रासन पानीका लागि दिएको सम्पूर्ण रकमको अडिट रेकर्ड नै रहेको दाबी गर्नुभयो। प्रधानमन्त्री दाहालले त्यतिबेला गिरिजाप्रसाद कोईराला प्रधानमन्त्री, डा. रामशरण महत अर्थमन्त्री रहेको र सरकारले रुजु गरिसकेको विषयलाई राजनीतिक आग्रह, पूर्वाग्रहकासाथ बारम्बार उठाउने गरेको भन्दै आफैँ अश्चर्यमा परेको बताउनु भयो ।

उहाँले ऐतिहासको त्यो परिघटनाले देशलाई शान्तिको नयाँ युगमा ल्याउन मद्दत गरेको बताउनु भयो। उहाँले क्यानटन्मेनमा हजारौं लडाकुहरु राखेर देशलाई, शान्तिलाई लोकतन्त्र र परिवर्तनलाई संस्थागत गर्न मद्दत समेत गरेको बताउनु भयो। उहाँले आफूले पार्टीको घोषणा पत्रमा २०४८ सालदेखिका सबै घटनाहरु र उच्च पदस्थ अधिकारीहरुको सम्पती र भ्रष्टाचारका सम्बन्धमा छानबिन गर्न तयार रहेको बताउनु भयो।

उहाँले सबै राजनीतिक तहमा एउटा संकल्पको साथ जाँदा अहिलेसम्म भएका भ्रष्टाचारको छानबिन गर्न सकिने भन्दै छानबिन गर्नसके मुलुकमा भ्रष्टाचारको नयाँ उन्मुक्तिको युग शुरु गर्न सकिने बताउनु भयो।