काठमाडौं । अमेरिकाले हालै सार्वजनिक गरेको एक प्रतिवेदनमा नेपालमा हिन्दु राष्ट्र बनाउनका लागि भारतीय जनता पार्टी (भाजपा) ले लगानी गरिरहेको उल्लेख गरेको छ ।

‘अन्तर्राष्ट्रिय धार्मिक स्वतन्त्रता प्रतिवेदन’ मा हिन्दु राष्ट्रका पक्षमा बोल्नका लागि नेपालका नेतालाई भाजपाले पैसा लगानी गरिरहेको बताइएको छ ।

नेकपा (मसाल) ले सो प्रतिवेदनमा उल्लेख गरिएको विषय सही भएको भन्दै नेपाललाई हिन्दुराष्ट्र बनाउन र राजा फर्काउन भारतीय संस्थापन पक्षले लगानी गरिरहेको बताएको छ ।

त्यसका साथै, आफ्नो साम्राज्यवादी उद्देश्य पूरा गर्न अमेरिकाले समेत नेपालमा लगानी गरिरहेको मसालले जनाएको छ ।
प्रवक्ता रामप्रकाश पुरीद्वारा जारी विज्ञप्तिमा यी दुवै शक्तिराष्ट्रको हस्तक्षेपविरुद्ध अझ संघर्ष गर्नुपर्ने आवश्यकता औँल्याइएको छ ।

यस्तो छ वक्तव्य
१. अमेरिकाद्वारा सार्वजनिक गरिएको ‘अन्तर्राष्ट्रिय धार्मिक स्वतन्त्रता प्रतिवेदन’ को उल्लेख गर्दै हिन्दु राष्ट्रका पक्षमा बोल्नका लागि नेपालका नेतालाई भाजपाले पैसा लगानी गरिरहेको कुरा सञ्चार माध्यमहरूमा सार्वजनिक भएको छ । भाजपासम्बद्ध धार्मिक समूहले नेपालका सबै राजनीतिक दलका प्रभावशाली नेतालाई हिन्दु राष्ट्रका समर्थनमा बोल्न निरन्तर रकम उपलब्ध गराउँदै आएको तथ्य पनि उक्त प्रतिवेदनमा भएको सञ्चार माध्यमहरूले उल्लेख गरेका छन् । नेपालका राजावादी र विभिन्न प्रतिगामी शक्तिहरूले नेपालमा गणतन्त्र र धर्मनिरपेक्षतालाई समाप्त पार्नका लागि भारतका कट्टर हिन्दुवादी शासक र धार्मिक समूहसित साँठगाँठ गर्दै आएको कुरा कुनै लुकेको कुरा होइन ।

२. त्यस सन्दर्भमा यो कुरा उल्लेखनीय छ कि हाम्रो पार्टीले जनताका विभिन्न संघर्ष र आन्दोलनबाट प्राप्त उपलब्धि, गणतन्त्र र धर्मनिरपेक्षतामा राजावादी लगायतका प्रतिगामी शक्तिहरूबाट गम्भीर खतरा भएकोले तिनीहरूको रक्षामा जोड दिनाको साथै संघर्ष समेत गर्दै आएको कुरा सर्वविदितै छ । गणतन्त्र र धर्मनिरपेक्षताका विरूद्ध प्रतिगामी शक्तिहरूले सुरूदेखि नै अभियान चलाउँदै आएका छन् । प्रतिगामी शक्तिहरूले नेपालमा राजतन्त्र र हिन्दुराज्य स्थापना गर्ने आफ्नो उद्देश्यलाई सफल पार्नका लागि भारतका कट्टर हिन्दुवादी शक्तिहरूसित साँठगाँठ गर्नुका साथै उनीहरूबाट पैँशा समेत लिने गरेको उक्त प्रतिवेदनमा उल्लेख भएको तथ्यबाट यो कुरा प्रष्ट छ कि नेपालमा गणतन्त्र र धर्मनिरपेक्षतामा गम्भीर खतरा रहेको छ ।

३. यो कुरा दिनको घाम झैँ छलङ्र्ग छ कि भारतका कट्टर हिन्दुवादीहरूले नेपालमा हिन्दु राज्यका लागि लगातार राजावादीहरूलाई उक्साउँदै आएका छन् । त्यही क्रममा नै नेपालका राजावादी र प्रतिगामीहरूले भारतका कट्टर हिन्दुवादी धार्मिक समूहबाट पैँसा लिएर नेपालमा जनआन्दोलन र जनसङ्घर्षका महत्वपूर्ण उपलब्धि गणतन्त्र र धर्मनिरपेक्षतालाई समाप्त गरी राजतन्त्र र हिन्दुराज्यका लागि आफ्नो प्रतिगामी अभियान चलाउने गरेको कुरा प्रष्ट छ । राजावादी र प्रतिगामी शक्तिहरूले गणतन्त्र र धर्मनिरपेक्षतालाई समाप्त गर्ने उद्देश्यका साथ जनताले बलिदानपूर्वक स्थापना गरेका लोकतान्त्रिक तथा गणतान्त्रिक मूल्यमाथि लगातार आक्रमण गर्ने गरेका छन् । त्यसका लागि उनीहरूले भ्रष्टाचार वा शासनपद्धतिमा रहेका समस्या र उक्त समस्याबाट जनतामा उत्पन्न असन्तोषलाई पनि उपयोग गर्ने प्रयत्न गर्दै आएका छन् ।

४. अहिले नक्कली भुटानी शरणार्थी समस्यालाई पनि राजावादी र प्रतिगामी तत्वहरूले गणतन्त्र र धर्मनिरपेक्षतालाई समाप्त पार्ने साधनका रूपमा उपयोग गर्न खोजेको कुरा प्रष्ट छ । हाम्रो यो स्पष्ट मत छ कि नक्कली भुटानी शरणार्थीका दोषीहरूमाथि निष्पक्ष छानवीन भई कडा कारवाही गरिनुपर्दछ । तर यसका साथै जनताको महान बलिदानीबाट प्राप्त उपलब्धि गणतन्त्र र धर्मनिरपेक्षतालाई समाप्त गर्नका लागि भारतका कट्टर हिन्दुवादी धार्मिक समूहबाट पैंशा लिएर वा जुनसुकै पनि प्रकारले प्रतिगमनको उद्देश्य पूरा गर्न नेपालमा प्रतिगामी अभियान चलाउने तत्व वा शक्तिका विरूद्ध पनि कडा कदम उठाउनुपर्ने वा सङ्घर्ष गर्नुपर्ने आवश्यकतामा हामीले जोड दिन्छौँ । प्रतिगामी षडयन्त्रका विरूद्ध सचेत र सतर्क रहन समेत हामीले सम्पूर्ण नेपाली जनतालाई अपील गर्दछौँ ।

५. राजावादी तथा विभिन्न प्रतिगामी शक्तिहरूले गणतन्त्र र धर्मनिरपेक्षतालाई समाप्त गर्नका लागि भारतका कट्टर हिन्दुवादी तत्वसित साँठगाँठ गरिरहेको तथ्य सार्वजनिक भइरहेको सन्दर्भमा हाम्रो ध्यान नेपालमा अमेरिकी साम्राज्यवादको प्रभाव बढेर गएको कुराप्रति पनि छ । अहिले नेपालमा अमेरिकी साम्राज्यवादको प्रभाव धेरै बढेर गएको छ । अमेरिकाले आफ्ना साम्राज्यवादी उद्देश्य पूरा गर्न प्रत्यक्ष रूपमा नै आफ्नो राजनीतिक संगठन कथित “स्वतन्त्र पार्टी” बनाएर नेपालको संसद, सरकार र राज्यका विभिन्न निकायमा आफ्नो शक्तिलाई विस्तार गर्दै लगिरहेको छ । अमेरिकी साम्राज्यवादले क्रिश्चयन धर्मको आडमा र जनतामा उत्पन्न कैयौँ असन्तोषलाई उपयोग गरेर आफ्नो राजनीतिक सङ्गठनलाई बलियो पार्ने र त्यसलाई आफ्नो उद्देश्य अनुसार सञ्चालन गर्न थालिसकेको छ । हामीले जनताको धार्मिक स्वतन्त्रताको हकलाई गलत मान्दैनौँ तर धर्मका नाममा गरिने साम्राज्यवादी गतिविधि नेपालको राष्ट्रियता, स्वतन्त्रता, स्वाधीनता र सार्वभौमिकता विरूद्ध रहेकोले अहिले देशमा बढिरहेको अमेरिकी साम्राज्यवादी गतिविधिका विरूद्ध जनताले कडा सङ्घर्ष गर्नुपर्ने आवश्यकतामा हामीले जोड दिन्छौँ ।’
२०८० जेष्ठ ०४ गते ।