काठमाडौं । नक्कली शरणार्थी प्रकरणमा आत्मसमर्पण गरेका नेपाली कांग्रेसका पूर्वसांसद आङतावा शेर्पा घाइते भएका छन् । उनी शौचालयमा लडेर घाइते भएको प्रहरीले दाबी गरेको छ ।
प्रहरी परिसर काठमाडौंको हिरासतमा रहेका शेर्पा राति शौचालय जाँदा लडेर टाउकोमा चोट लागेको प्रहरीले जनाएको छ । उनलाई ट्रमा सेन्टरमा उपचारपछि पुनः हिरासतमा ल्याइएको छ ।
नक्कली भुटानी शरणार्थी प्रकरणमा पक्राउ पुर्जी जारी भएपछि फरार उनले हिजो (सोमबार) साँझ मात्र प्रहरीसमक्ष आत्मसमर्पण गरेका हुन्।
भुटानी शरणार्थीका नाममा ठगी गरेको आरोपमा अदालतबाट उनीविरुद्ध पनि शुक्रबार पक्राउ पुर्जी जारी भएको थियो। पक्राउ पुर्जी जारी हुनु पहिले नै फरार भएका शेर्पा आफैं प्रहरी कार्यालयमा उपस्थित भएका हुन्।
उनीविरुद्ध प्रहरीले वैशाख ३१ गते पक्राउ पुर्जी जारी गरेको थियो।
यो प्रकरणमा पक्राउ परेका बिचौलियालाई हिरासतमा भेटेर कांग्रेस नेताहरूलाई बयानमा नपोल्न दबाब दिएको आरोप शेर्पालाई लागेको छ।
खासगरी शेर्पाले बालकृष्ण खाँणको नाम नलिन हिरासतमै पुगेर सानु भण्डारी र केशव दुलाललाई भेटेका थिए। उनले पीडितको रकम फिर्ता गरिदिने भन्दै खाँणलाई जोगाउन खोजेका थिए।
शरणार्थी प्रकरणमा पक्राउ पर्नेको संख्या १४ पुगेको छ।
