काठमाडौं । नेपाली कांग्रेसका नेता तथा पूर्वगृहमन्त्री बालकृष्ण खाँण पक्राउ परेका छन्। खाँणलाई बुधबार बिहान उनकै निवास चाबहिलबाट पक्राउ गरिएको प्रहरीले जनाएको छ ।
नक्कली भुटानी शरणार्थी प्रकरण अनुसन्धानका क्रममा तत्कालीन गृहमन्त्री खाँणलाई प्रहरीले नियन्त्रणमा लिएको हो।
उनी गृहमन्त्री भएका बेला गृहसचिव रहेका हाल उपराष्ट्रपतिको कार्यालयका सचिव टेकनारायण पाण्डे पक्राउ परेपछि खाँण पनि अनुसन्धानमा तानिएका हुन्।
नेपाली नागरिकलाई नक्कली भुटानी शरणार्थी बनाएर अमेरिका पठाउन भन्दै करोडौं रकम असुलेको उक्त काण्डमा यसअघि मंगलबारसम्म १० जना पक्राउ परिसकेका छन्।
सोही प्रकरणमा पूर्वउपप्रधानमन्त्री एवं नेकपा एमालेका सचिव टोपबहादुर रायमाझीलाई पनि प्रहरीले खोजिरहेको छ। हाल उनी फरार छन्। उनका छोरा सन्दीप भने अहिले प्रहरीको हिरासतमा छन्।
यस्तै सो प्रकरणमा एमाले उपाध्यक्ष रामबहादुर थापा बादल गृहमन्त्री भएका बेला सुरक्षा सल्लाहकार रहेका इन्द्रजित राई पनि पक्राउ परिसकेका छन्।
खाँणका निजी सचिव केसी पनि पक्राउ
पूर्वगृहमन्त्री खाँणसँगै प्रहरीले उनका स्वकीय सचिव नरेन्द्र केसीलाई पनि प्रहरीले नियन्त्रणमा लिएको छ। बुधबार बिहान खाँणकै निवास चाबहिलबाट खाँणसँगै केसीलाई पनि प्रहरीले नियन्त्रणमा लिएको हो ।
उनीहरूलाई अपराध महाशाखा बानेश्वर लगिएको काठमाडौं प्रहरी परिसरले जनाएको छ ।
१२ जना पक्राउ
नक्कली भुटानी शरणार्थी प्रकरणमा पूर्वगृहमन्त्री खाँण र उनका स्वकीय सचिव केसी पक्राउ परेसँगै पक्राउ पर्नेको संख्या १२ पुगेको छ ।
प्रहरीले मंगलबार काठमाडौं टोखाका रामशरण केसी र मोरङका गोविन्द चौधरीलाई पक्राउ गरेको थियो।
त्यसअघि प्रहरीले पूर्वगृहमन्त्री रामबहादुर थापाका सुरक्षा सल्लाहकार इन्द्रजित राई, बहालवाला सचिव (तत्कालीन गृहसचिव) टेकनारायण पाण्डे, ललितपुर महानगरपालिका–२३ घर भएका सानु भण्डारी, एमाले सचिव टोपबहादुर रायमाझीका छोरा सन्दीप रायमाझी, मोरङको पथरी शनिश्चरे नगरपालिका–१० घर भएका केशवप्रसाद दुलाल, पाँचथरको फिदिम नगरपालिका–७ घर भएका टंककुमार गुरुङ, दाङ घर भएका सन्देश शर्मा र मोरङको पथरी शनिश्चरे नगरपालिका–१० का पूर्ववडाध्यक्ष सागर राई पक्राउ परिसकेका छन्।
