काठमाडौं । प्रहरीले नेकपा एमालेका सचिव एवम् पूर्वउपप्रधानमन्त्री टोपबहादुर रायमाझीलाई पक्राउ गर्न सबै जिल्ला प्रहरी कार्यालयमा सर्कुलर गरेको छ।
उनलाई पक्राउ गर्न प्रहरीको केन्द्रीय अनुसन्धान ब्यूरोसमेत परिचालन गरिएको छ ।आफैं आउँछु भन्दै प्रहरीलाई ढाँटेर भागेका रायमाझीलाई पक्राउ गर्न जिल्ला प्रहरी परिसर काठमाडौंको अनुरोधमा प्रहरी प्रधान कार्यालयलले सबै जिल्लामा सर्कुलर गरेको हो।
भुटानी शरणार्थी बनाएर नेपालीलाई अमेरिका पठाइदिने भन्दै ठगी गरेको आरोपमा टोपबहादुरविरुद्ध पक्राउ पुर्जी जारी भएपछि गत बुधबारदेखि रायमाझी फरार भएका छन्। त्यसै साँझदेखि उनी मोबाइल बन्द गरेर भागेका हुन्।
प्रहरी महानिरीक्षक वशन्त कुंवरलाई नै फोन गरेर आफैं उपस्थित हुने बताएपछि उनलाई पक्राउ गर्न खटिएको प्रहरी पनि फिर्ता भएको थियो।
काठमाठौं प्रहरी परिसरले रायमाझीलाई बुटवलबाटै पक्राउ गर्ने तयारी गरेको थियो। तर काठमाडौं ओर्लिनासाथ पक्राउ गर्ने बुझेपछि रायमाझी सम्पर्कबिहिन भएका थिए। फरार भएका रायमाझी भारत भागेको प्रहरीको आशंका छ।
उनका छोरा सन्दीपसहित ८ जनालाई प्रहरीले पक्राउ गरिसकेको छ। पूर्व गृहमन्त्री रामबहादुर थापाका सुरक्षा सल्लाहकार इन्द्रजित राई, पूर्व गृहसचिव टेकनारायण पाण्डे, केशव दुलाल, सानु भण्डारी, सन्देश शर्मा, सागर राई, टंक गुरुङ पनि थुनामा छन्। अन्य केही फरारको खोजि भइरहेको प्रहरीले जनाएको छ।
