काठमाडौं । नेकपा (मसाल) ले राष्ट्रिय स्वतन्त्र पार्टी (रास्वपा) ले सरकारलाई दिएको समर्थन फिर्ता लिनु सकारात्मक भएको बताएको छ ।

सरकारबाट राजावादी र अमेरिकी साम्राज्यवादपरस्त शक्ति हट्दै जानु र सरकारसँग दूरी कायम हुनु स्वागतयोग्य हुने मसालको ठहर छ ।

मसालले नेपालको लोकतन्त्रविरुद्ध राजावादी शक्ति तथा साम्राज्यवादपरस्त तत्वहरुबीच कार्यगत एकता हुनसक्ने आशंका पनि गरेको छ । महामन्त्री मोहनविक्रम सिंहले आइतबार प्रेसित गर्नुभएको वक्तव्यमा कथित स्वतन्त्र पार्टीले आगामी निर्वाचनमा बहुमत ल्याएर सरकार गठन गर्ने र अमेरिकी उद्देश्य पूरा गर्ने योजना अनुसार संगठन विस्तार गरिरहेको भन्दै त्यसप्रति सजग रहनुपर्ने स्पष्ट पार्नुभएको छ ।

मसालले नक्कली भुटानी शरणार्थी प्रकरणले नेपालमा भ्रष्टाचारको अवस्था अत्यन्त गम्भीर रहेको प्रष्ट पारेको भन्दै दोषी जतिसुकै उच्चपदस्थ भएपनि कारबाही गर्नुपर्ने बताएको छ ।

यस्तो छ वक्तव्य
कथित स्वतन्त्र पार्टीले सरकारमा नजाने र सरकारलाई दिएको समर्थन फिर्ता गर्ने जुन निर्णय गरेको छ, हामीले त्यो निर्णयलाई नकारात्मक दृष्टिकोणले स्वागत गर्दछौँ । अहिलेको गठबन्धन सरकारमा जुन हदसम्म राजावादी वा साम्राज्यवादपरस्त तत्वहरू हट्दै जान्छन्, त्यो हदसम्म हामीले त्यसलाई सकारात्मक रूपमा नै लिनुपर्दछ । त्यही अर्थमा अहिलेको सरकारलाई कथित स्वतन्त्र पार्टीले समर्थन फिर्ता लिनुलाई हामीले सकारात्मक अर्थमा नै लिएका छौँ र लिनु पनि पर्दछ ।

कथित स्वतन्त्र पार्टीले कतिपय भ्रष्टाचार सम्बन्धी विषयमा भिन्न मत भएको हुनाले सरकारबाट हटेको बताएको छ । तर वास्तविकता त्यो भन्दा बेग्लै छ । उनीहरूले सामान्यतः पहिले उनीहरूले प्राप्त गरेका मन्त्रालयहरू, विशेषतः गृहमन्त्रालयको दाबी गरेका थिए, त्यो मन्त्रालय नपाएको हुनाले नै उनीहरू सरकारमा सामेल भएनन् र सरकारलाई दिएको समर्थन पनि फिर्ता लिएका छन् ।

जहाँसम्म उनीहरूले चर्को रूपमा उठाएको भ्रष्टाचार सम्बन्धी प्रश्न छ, उनीहरू स्वयम् विभिन्न प्रकारका अवैध कार्यहरू वा भ्रष्टाचार सम्बन्धी मुद्दाहरूमा मुछिएका छन् । एकातिर, त्यस प्रकारका आरोपहरूमा आफ्नो वचावट र, अर्कातिर, देशको सम्पूर्ण प्रशासन, प्रहरी, सशस्त्र प्रहरी, अनुसन्धान विभाग समेतमा आफ्नो नियन्त्रण कायम गर्नका लागि नै उनीहरूले गृहमन्त्रालयको माग गरिरहेका थिए । उनीहरूलाई गृहमन्त्रालय दिन अस्वीकार गरेकोमा हामीले प्रचण्ड सरकारलाई धन्यवाद दिन्छौँ ।

कथित स्वतन्त्र पार्टीले तीब्र गतिले सङ्गठनका लागि प्रयत्न गर्ने र अर्को चुनावसम्म संसदमा बहुमत प्राप्त गरेर प्रधानमन्त्री बन्ने समेत दाबी गरेको छ । उनीहरूको त्यो दाबीलाई हल्का रूपमा लिनु अदूरदर्शीता हुनेछ । खास गरेर उनीहरूका पछाडि अमेरिकी साम्राज्यवादको बल भएको हुनाले र त्यसको कथित स्वतन्त्र पार्टीलाई शक्तिशाली बनाउनुको उद्देश्य पूरै नेपाललाई इन्डोप्यासिफिक रणनीतिमा सामेल गरेर आफ्नो सैन्य क्याम्पमा लैजानु भएको हुनाले त्यसले कथित स्वतन्त्र पार्टीलाई सत्तामा पु¥याउनको लागि योजनावद्ध प्रकारले काम गर्ने कुरा प्रष्ट छ ।

नेपालका सबै देशभक्त जनताले अमेरिकाको त्यस प्रकारको षडयन्त्रलाई गम्भीर रूपमा लिनुपर्ने आवश्यकता छ । अमेरिकाले पहिलेदेखि नै विभिन्न राजनीतिक पार्टीहरूमा आफ्ना मान्छेहरू घुसाउँदै आएको छ । यो सम्भावनलाई पनि अस्वीकार गर्न सकिन्न कि नेपालका विभिन्न राजनीतिक पार्टी वा संघसंस्थाहरूमा घुसपैठ गरिएका त्यस प्रकारका अमेरिकापरस्त तत्वहरूलाई क्रमशः कथित स्वतन्त्र पार्टीमा आवद्ध गर्दै लैजान नीति अपनाइने छ । तनहुँको उदाहरण हाम्रा अगाडि छ । त्यो प्रक्रिया त्यहीँसम्म सीमित नरहेर त्यसको अरू विस्तार हुँदै जाने कुराको सजिलैसित अनुमान गर्न सकिन्छ ।

यो कुरा प्रष्ट छ कि राजापरस्त र अमेरिकी साम्राज्यवादपरस्त तत्वहरूले गठबन्धन गरेर लोकतन्त्र र राष्ट्रियता समेतका विरूद्ध काम गर्ने कुरा निश्चित छ । त्यही रणनीतिअन्तर्गत नै उनीहरूका विचमा गठबन्धन पनि हुँदै गइरहेको छ । त्यस प्रकारको गठबन्धन र अहिलेको सत्तारूढ गठबन्धनका विचमा जति बढी रेखा खिचिदै जान्छ, त्यति नै त्यो देश र जनताको हितमा हुनेछ । अहिलेको सरकारमा पनि प्रतिगमन वा साम्राज्यवादका विरूद्ध विभिन्न रूपमा ढुलमुल र अवसरवादी प्रवृत्तिहरू पाइन्छन् । त्यस प्रकारका प्रवृत्तिहरूको आलोचना गर्दै प्रतिगमन र साम्राज्यवादका विरूद्धको संघर्षलाई अरू व्यापक र उच्च स्तरमा उठाउनुपर्ने आवश्यकतामा हामीले जोड दिन्छौँ ।

अहिले देशमा उठेको नक्कली भुटानी शरणार्थीको मुद्दालाई हाम्रो पार्टीले गम्भीर रूपमा लिएको छ । ठुलो संख्यामा नेपालीहरूलाई नक्कली भुटानी बनाएर विदेश पठाउने योजना भ्रष्टाचारको अत्यन्त गम्भीर रूप हो । त्यसले नेपालमा भ्रष्टाचारले अत्यन्त गम्भीर रूप लिएको कुरालाई नै बताउँछ । त्यो सम्पूर्ण कारवाहीमा उच्च स्तरीय प्रशासन र राजनीतिक नेतृत्वको संलग्नताले त्यो मुद्दालाई अरू गम्भीर बनाउँछ । त्यो मुद्दाका सिलसिलामा कतिपय व्यक्तिहरू गिरफ्तार पनि भएका छन् । तर पर्दा पछाडि उनीहरूलाई उम्काउने वा मुद्दालाई कमजोर बनाउने प्रयत्न त भइरहेका छैनन् ? त्यो शङ्का गर्ने ठाउँ पनि छ ।

यस सन्दर्भमा अर्को गम्भीर प्रश्नप्रति पनि हाम्रो ध्यान जानुपर्ने आवश्यकता छ । जुन ठूलो पैमानामा त्यो भ्रष्टाचार गरिएको छ, त्यो बेलाको सरकारको उच्च नेतृत्वको सहमति बिना त्यो कार्य हुन नसक्ने कुराको पनि सजिलैसित अनुमान गर्न सकिन्छ । त्यस प्रकारको पृष्ठभूमिमा उक्त भ्रष्टाचारका सन्दर्भमा कुनै निर्दोष व्यक्तिमाथि कुनै सजाय नहोस् तथा जतिसुकै उच्च पदको भएपनि दोषी उम्कन नपाओस् भन्ने कुरामा हाम्रो पार्टीले विशेष जोड दिन्छ ।
२०८० वैशाख २४ गते ।
मोहनविक्रम सिंह
महामन्त्री