काठमाडौं । राष्ट्रिय स्वतन्त्र पार्टी (रास्वपा) ले सरकारलाई दिएको समर्थन फिर्ता लिएको छ । शुक्रबार बसेको बैठकले सरकारलाई दिएको समर्थन फिर्ता लिने निर्णय गरेको हो ।
२१ सदस्य रहेका रास्वपाले समर्थन फिर्ता लिएसँगै पुष्पकमल दाहाल प्रचण्ड नेतृत्वको सरकारको के हुन्छ भन्ने प्रश्न उठेको छ । तर, सरकारको भविष्यमाथि प्रश्न उठेपनि सरकारले प्रतिनिधि सभामा बहुमत भने गुमाएको छैन।
यसअघि ६ चैतमा विश्वासको मत लिएका प्रधानमन्त्रीलाई प्रतिनिधि सभाका १ सय ७२ सदस्यको समर्थन थियो। एमाले र राष्ट्रिय प्रजातन्त्र पार्टीले विपक्षमा मतदान गर्दा विपक्षमा ८९ मत थियो ।
अब प्रचण्डलाई विश्वासको मत फिर्ता लिनेमा एमाले, राप्रपासँगैसँगै रास्वपा पनि थपिएको छ भने नेपाली कांग्रेस, माओवादी केन्द्र, रास्वपा, जनता समाजवादी पार्टी (जसपा), एकिकृत समाजवादी, लोकतान्त्रिक समाजवादी पार्टी (लोसपा), जनमत पार्टी, नागरिक उन्मुक्ति पार्टी, आम जनता पार्टी, राष्ट्रिय जनमोर्चा र स्वतन्त्र सांसदहरुको समर्थन कायमै छ।
हाल प्रतिनिधि सभामा नेपाली कांग्रेसका ८७, माओवादी केन्द्रका ३२, जसपाका १२, एकीकृत समाजवादीका १०, जनमत पार्टीका ५, लोसपाका ४, नागरिक उन्मुक्ति पार्टीका ४, आम जनता पार्टीका १, राष्ट्रिय जनमोर्चाका १ सांसद छन्। यी सबै सांसदहरुको संख्या जोड्दा १ सय ५६ हुन आउछ। अमरेशकुमार सिंह लगायतका स्वतन्त्र सांसदको समर्थनपनि अहिलेसम्म सरकारलाई छ।
यस हिसाबले अहिलेसम्म प्रधानमन्त्री प्रचण्ड सुरक्षित स्थितिमा छन्। अब प्रतिनिधि सभाका १८ जना सांसदले समर्थन फिर्ता लिए भने चाहिँ सरकार अप्ठेरोमा पर्ने छ ।
