काठमाडौँ । अन्तर्राष्ट्रिय नेपाली एकता समाजले एक सय चौतिसौँ मेदिवस मनाएको छ ।
राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेलको प्रमुख आतिथ्यमा २०८० वैशाख १८ गते तदनुसार मे १, २०२३ सोमबार भर्चुअल माध्यमबाट सो कार्यक्रम सम्पन्न भएको हो ।
सो अवसरमा मन्तव्य राख्दै प्रमुख अतिथि पौडेलले अन्तर्राष्ट्रिय मजदुर दिवसको गम्भीर महत्त्व रहेको बताउनुभयो ।
उहाँले मजदुर वर्गमा नै संसार परिवर्तन गर्न सक्ने सामथ्र्य रहेको उल्लेख गर्दै मजदुर वर्गको नेतृत्वमा नयाँ जनवादी क्रान्ति सम्पन्न भएपछि मात्रै नेपाली जनताको मुक्ति सुरु हुने बताउनुभयो ।
कार्यक्रममा मन्तव्य राख्दै नेकपा (मसाल) का प्रवक्ता रामप्रकाश पुरीले मजदुर दिवसको अवसर पारेर पार्टीले ऐतिहासिक तीन अभियानको सुरुआत गरेको र सो अभियान आगामी एक वर्षसम्म निरन्तर चलिरहने जानकारी दिनुभयो ।
उहाँले ऐतिहासिक तीन अभियानभित्र लेनिनको शताब्दी स्मृतिदिवस, नेकपाको हीरक जयन्ती र पार्टीको नवौँ महाधिवेशन सँगसँगै अघि बढ्ने पनि बताउनुभयो ।
उहाँले उक्त आन्दोलनलाई सफल पार्न विदेशस्थित नेपालीहरूको महत्त्वपूर्ण भूमिका रहने प्रष्ट्याउनुभयो ।
कार्यक्रममा नेकपा (मसाल) बागमती प्रदेश ब्युरोका प्रवक्ता समीर सिंह, मूल प्रवाह अखिल भारत नेपाली एकता समाजका अध्यक्ष ठाकुर खनाल, समाजकै महासचिव केबी थापा र अखिल नेपाल ट्रेड युनियन महासङ्घ (अन्टुक) का अध्यक्ष लोकराज भुसालले पनि मन्तव्य राख्नुभएको थियो ।
कार्यक्रममा नेकपा (मसाल) को ऐतिहासिक तीन अभियानसम्बन्धी प्रस्ताव वाचन गरिएको थियो ।
सो अवसरमा अखिल नेपाल जनजाति सम्मेलनका अध्यक्ष निमबहादुर बुढाथोकी, अन्तर्राष्ट्रिय नेपाली एकता समाजका सल्लाहकारहरू दुर्गाबहादुर केसी (नेपाल), विन्दु खड्का (साइप्रस), धनवीर पुन (भारत), तेजेन्द्र क्षेत्री (जापान), निशा शर्मा (बेलायत), ढुण्डिराज चुँदाली (रुस), पृथ्वी भट्ट (अस्ट्रेलिया), तारानाथ पोख्रेल (रोमानिया) र लेखत कुँवर (दक्षिण कोरिया) को पनि आतिथ्य रहेको थियो ।
समाजका अध्यक्ष शक्तमान बुढाथोकीको अध्यक्षता तथा सचिव छविलाल बस्नेत र केन्द्रीय सदस्य खुम रायमाझीको सञ्चालनमा अघि बढेको उक्त कार्यक्रममा केन्द्रीय सदस्य राजकुमार धिताल र रक्तिम सांस्कृतिक अभियान ओमनका कलाकारद्वारा स्वागत गरिएको थियो ।
