काठमाडौं । बलात्कार प्रयास गरेको आरोपमा पुर्पक्षका लागि थुनामा परेका पूर्वसभामुख कृष्णबहादुर महराविरुद्धको मुद्दाको फैसला आज (सोमबार) हुने भएको छ। काठमाडौं जिल्ला अदालतले आज मुद्दाको फैसला गर्ने भएको हो ।
आइतबार मुद्दाको फैसला सुनाउने तयारी भएकोमा अन्तिम समयमा आजको लागि सारिएको थियो । न्यायाधीश अम्बरराज पौडेलको इजलासमा महराविरुद्ध मुद्दाको सुनुवाइ आइतबारै सकिए पनि टाइपिङमा ढिलाइ भएको भन्दै सोमबारका लागि सुनुवाई सारिएको थियो ।
महराविरुद्ध करणी प्रयासमा ५ वर्ष र सार्वजनिक पद धारण गरेर कसुरको प्रयास गरेको भन्दै थप साढे २ वर्ष गरी साढे ७ वर्ष कैद सजाय माग गर्दै अभियोगपत्र दायर गरिएको छ ।
गत असोज १२ गतेर संसद् सचिवालयकी कर्मचारी रोशनी शाहीले महराले आफूलाई जबर्जस्ती करणी प्रयास गरेको बताएकी थिइन् ।असोज १४ गते सभामुख पदबाट राजीनामा दिएका उनी असोज १९ गते सभामुख निवासबाटै पक्राउ परेका हुन् । तत्कालीन जिल्ला न्यायाधीश सुर्दशनराज पाण्डेको इजलासले महरालाई कात्तिक १८ गते पुर्पक्षका लागि थुनामा पठाएको थियो ।
जिल्ला अदालतको आदेशविरुद्ध महराले उच्च अदालत पाटनमा पुनरावेदन दिए पनि जिल्लाकै आदेश सदर भयो ।
अदालतमा बयान दिँदा भने आरोप लगाउने शाहीले महराले आफूलाई करणी प्रयास नगरेको बताएकी थिइन् । उनले सोही विवरणको निवेदन समेत अदालतमा दिएकी थिइन् ।
आइतबार जिल्ला अदालतमा भएको बहसमा महराका पक्षबाट रमण श्रेष्ठ, शेरबहादुर केसी, लभ मैनाली, दीनमणि पोखरेल, भीमार्जुन आचार्यलगायत ८ वकिलले बहस गरेका थिए । सरकारी पक्षबाट उमाकान्त खनाललगायत वकिलले जवाफ दिएका थिए ।
