बेनी । वरिष्ठ हाडजोर्नी विशेषज्ञ डा. गोविन्द केसीले म्याग्दीको ग्रामीण क्षेत्रमा पुगेर बिरामीको उपचार गर्नुभएको छ ।
म्याग्दीको अन्नपूर्ण गाउँपालिका–२ को भुरुङ तातोपानी स्वास्थ्यचौकीमा उहाँले २०८० वैशाख १० र ११ गते हाडजोर्नीसम्बन्धी बिरामीको उपचार गर्नुभएको हो ।
दुई दिनसम्म उहाँले एक सय २५ जनाको उपचार गर्नुभएको भुरुङ तातोपानी स्वास्थ्यचौकीका प्रमुख कृष्ण केसीले जानकारी दिनुभयो ।
वैशाख १० गते ५५ र वैशाख ११ गते ७० बिरामीको उपचार गर्नुका साथै परामर्श सेवा दिनुभएको थियो । स्वास्थ्यचौकीका प्रमुख केसीसहित सिनियर अहेव विक्रम पुन, अनमी नीता पुन, सनम बुद्धुजा पुन, अहेव चौथो सङ्गिना मगरातीलगायतले डा. केसीलाई सघाउनुभएको थियो ।
चिकित्सा शिक्षाका अभियान्ता डा. केसीले गत हप्ता बागलुङको निसिखोला गाउँपालिकाको बोहोरागाउँ स्वास्थ्यचौकीमा तीन दिन उपचार गर्नुभएको थियो । बागलुङबाट कुनै खबरबिना भुरुङ तातोपानी आउनुभएको हो । गाउँपालिका र स्वास्थ्यचौकीले औषधिको व्यवस्थापन गरेको थियो ।
‘पूर्व जानकारीबिनै डा. केसी स्वास्थ्यचौकीमा आउनुभएको थियो’ स्वास्थ्यचौकी प्रमुख केसीले भन्नुभयो– “हामी पनि अचम्ममा पर्यौं ।’
स्वास्थ्यचौकीले सामाजिक सञ्जाल, महिला स्वास्थ्य स्वयम्सेविका, जनप्रतिनिधि र सङ्घसंस्थामार्फत सेवा लिनका लागि सर्वसाधारणलाई अनुरोध गरेको थियो ।
दाना, नारच्याङ, भुरुङ तातोपानी, घार, शिख, पाउद्धार, पोखरेबगर, ठुलोबगरका सर्वसाधारण सेवा लिन आएका थिए । फुर्सदको समयमा ग्रामीण क्षेत्रका बिरामीको उपचारका लागि आएको डा केसीले बताउनुभयो ।
‘ग्रामीण क्षेत्रमा हाडजोर्नी तथा नशारोगसम्बन्धी समस्या भएका धेरै बिरामी उपचारको पहुँच बाहिर छन्’ उहाँले भन्नुभयो– ‘फुर्सदको समयमा गाउँमै पुगेर सेवा दिने उद्देश्यले म्याग्दी आएको हुँ ।’ (रासस)
