बागलुङ । राष्ट्रिय जनमोर्चाका अध्यक्ष चित्रबहादुर केसीले चुनाव खर्च सार्वजनिक गर्नुभएको छ । अध्यक्ष केसीका निर्वाचन प्रतिनिधि राजमो नेता थानेश्वर सुवेदीले आइतबार पत्रकार सम्मेलन गरेर खर्च विवरण सार्वजनिक गर्नुभएको हो ।
निर्वाचन भएको ३५ दिनभित्र खर्च विवरण निर्वाचन आयोगमा बुझाउनुपर्ने कानुनी प्रावधान अन्तर्गत राजमोले तोकिएको समयभित्रै विवरण बुझाएको छ ।
निर्वाचन कार्यालयमा बुझाइएको खर्च सार्वजनिकीकरण गर्नुपर्ने कानुनी प्रावधान छ । समयमा खर्च सार्वजनिक नभए उमेदवारलाई थप जरिवाना लाग्ने कानुनी व्यवस्था छ ।
आयोगमा पठाएकै खर्च विवरण पत्रकार सम्मेलनमार्फत सार्वजनिक गरिएको हो ।
नेता सुवेदीका अनुसार गत मंसिर ४ गते भएको निर्वाचनमा उम्मेदवार रहनुभएका केसीको १८ लाख १४ हजार रुपैयाँ खर्च भएको थियो ।
जसमा मतदाता नामावली खरिद, छपाई र फोटोकपीमा ९० हजार, सवारी साधन भाडा तथा इन्धन खर्च ८ लाख ६० हजार र प्रचार सामग्रीमा २ लाख १० हजार खर्च भएको छ ।
त्यस्तै, सामग्री ढुवानीमा २० हजार, कार्यालय सञ्चालन गर्दा २ लाख ५० हजार, प्रतिनिधि परिचालन खर्च २ लाख ५० हजार, विद्युतीय छापा खर्च ४० हजार र सामाजिक सञ्जाल खर्च १० हजार तथा विविधमा १ लाख ३४ हजार खर्च भएको सुवेदीले जानकारी दिनुभयो ।
केसी गत मंसिरको निर्वाचनमा बागलुङ–१ बाट प्रतिनिधिसभामा निर्वाचित हुनुभएको थियो ।
