कञ्चनपुर । कञ्चनपुरको बेलौरी छोटी भन्सारको स्तरोन्नती गर्न स्थानीय व्यवसायीहरुले माग गरेका छन् ।
शुक्रबार बेलौरीका उद्योगी व्यवसायीले बेलौरी बजारदेखि वैशाखा छोटी भन्सार कार्यालयसम्म प्रदर्शन गरेका छन् । त्यसक्रममा उनीहरुले बेलौरी छोटी भन्सारलाई कैलाली अन्तर्गत राखिएकोप्रति पनि आपत्ति जनाए ।
व्यवसायीले ‘बेलौरी भन्सार कञ्चनपुर हो, किन लेख्यौ कैलाली ?’, ‘दाहाल देउवा ओली, कस्ले गर्यो तालाबन्दी’ ‘दाहाल देउवा ओली, भुल्यौ आफ्नै बोली’ ‘राम्ररी हेर राम्ररी सुन, आँखा कान खोली’ जस्ता नारा लगाएका थिए ।
कार्यक्रमको नेतृत्व पूर्वशिक्षक केशवराज जोशी र बेलौरी उद्योग वाणिज्य संघका अध्यक्ष टेकबहादुर साउदले गरेका थिए । सो कार्यक्रमपछि आयोजित कोणसभामा उद्योगी व्यवसायीका अगुवाहरुले सम्बोधन गरेको स्थानीय नन्दु रानाले जनाएका छन् ।
छोटी भन्सार कार्यालय पूर्ण रुपमा सञ्चालनमा नआउँदा हाल न्यून मात्रै राजस्व सङ्कलन हुँदै आएको छ । बेलौरी भन्सार कार्यालयको स्तरोन्नती गरिए यस क्षेत्रका बासिन्दाको आयस्तरमा वृद्धि हुने र राजश्व पनि बढ्ने स्थानीयको भनाई छ ।
छोटी भन्सार कार्यालय पुनस्र्थापनासँगै स्तरोन्नति गर्ने उद्देश्यले २०७५ साल मंसिरमा काठमाडौंमा भएको नेपाल–भारत दुवै देशका भन्सार विभागको उच्चस्तरीय प्रतिनिधिमण्डलको भेलाले बेलौरी छोटी भन्सार कार्यालयसहित देशका पाँचवटा सीमा बिन्दुमा भन्सार कार्यालय स्थापना गर्ने र स्तरोन्नतीका लागि सम्भाव्यता अध्ययन गर्ने निर्णय गरेपनि कार्यान्वयन नभएको स्थानीयको आरोप छ ।
१९१७ देखि २०१९ सालसम्म कैलाली र कञ्चनपुरको मुख्य भन्सारको रुपमा रहेको बेलौरी जिल्ला सदरमुकाम विस्थापित भएपछि ओझेलमा पर्दै आएको छ ।
बेलौरी धनगढीबाट लगभग २५ किलोमिटर मात्रै टाढा रहेको छ । बेलौरी–धनगढी हुलाकी सडकले जोडेको छ ।
