काठमाडौं । लामो प्रतिक्षापछि चीनको वुहानबाट १७५ जना नेपाली काठमाडौं आइपुगेका छन् । आइतबार बिहान काठमाडौं उत्रिएका उनीहरुलाई भक्तपुरको खरिपाटीमा राखिएको छ ।
कोरोना भाइरसको उद्गमस्थल वुहानमा रहेका १८५ जना नेपाली विद्यार्थीलाई लिन शनिबार वाइडबडी जहाज त्यसतर्फ उडेको थियो । वुहानबाट शनिबार राति नेपाल उड्ने तयारीमा रहेका १ जना ८५ नेपालीमध्ये १० जना भने उतै रोकिएका छन् । ६ जना ज्वरो आएका कारण र ४ जना उतै बस्न चाहेकाले नेपाल नफर्किएको बेइजिङस्थित नेपाली दूतावासले जनाएको छ ।
आज बिहान ४ बजे त्रिभुवन विमानस्थलमा अवतरण गरेका उनीहरूलाई त्यहाँ स्वास्थ्य जाँच गरेपछि ६ वटा बसमा राखेर खरिपाटीस्थित नेपाल विद्युत् प्राधिकरणको तालिम केन्द्रमा पुर्याइएको थियो ।
कोरोना भाइरस संक्रमणका लक्षण १४ दिनमा देखिने भएकाले उनीहरूलाई क्वारेन्टाइन अर्थात् परिवारलगायत अन्य स्वस्थ मानिसको सम्पर्कबाट टाढा सुरक्षित स्थलमा राखिएको हो । स्वास्थ्य अवस्था सामान्य रहेको एकिन पछि उनीहरुलाई घर पठाइनेछ ।
ज्यान गुमाउनेको संख्या १६ सय नाघ्यो, ६९ हजार संक्रमित
महामारीको रुपमा फैलिएको कोरोना भाइरसबाट ज्यान गुमाउनेको संख्या शनिबारसम्म एक हजार ६ सय ६९ पुगेको अन्तर्राष्ट्रिय सञ्चार माध्यमहरुले जनाएका छन् । कोरोनाबाट संक्रमित हुनेको संख्या ६९ हजार पुगेको छ ।
अहिलेसम्म चीनमा मात्रै यो भाइरसबाट एक हजार ६ सय ६५ जनाको ज्यान गइसकेको छ । त्यसैगरी फिलिपिन्स, हङकङ, जापान र फ्रान्समा कोरोनाबाट एक(एक जनाको ज्यान गएको छ ।
