काठमाडौं । रक्तिम सांस्कृतिक अभियानले आफ्नो चौथो राष्ट्रिय सम्मेलन आगामी वैशाख १, २ र ३ गते बुटवलमा गर्दैछ । राष्ट्रिय सम्मेलनको तयारीका क्रममा रक्तिमले विभिन्न जिल्लामा भेला, सम्मेलन, प्रशिक्षण लगायतका अभियान सञ्चालन गरिरहेको छ ।
यसै सन्दर्भमा राष्ट्रिय सम्मेलनको सन्देश दिन रक्तिम काठमाडौंले काठमाडौंका विभिन्न स्थानमा सडक सांस्कृतिक अभियान सञ्चालन गरेको छ । शनिबार काठमाडौंका कलंकी, स्वयम्भू, माछापोखरी, बसपार्क र बसुन्धरालगायत क्षेत्रमा रक्तिमले सडक अभियान सञ्चालन गरेको हो ।
त्यसक्रममा ‘आँधिको बेग बनी, चाहे चुँडियोस्, उस्तै छ हामीलाई पिरलो’ लगायतका गीत प्रस्तुत गर्नुका साथै सडक नाटकसमेत प्रदर्शन गरिएको रक्तिमका उपाध्यक्ष हेमराज आश्रमले जानकारी दिनुभयो ।
आश्रमको नेतृत्वमा रहेको टोलीमा रक्तिम काठमाडौंका जिल्ला अध्यक्ष मेस्मा पुन, उपाध्यक्ष राम परियार, कलाकारहरु कविता चौधरी, मिलन सिंजाली, मनिता सिंजाली, बेली सिंजाली, सुप्रभात कार्की, मदन पाण्डे, सुशीला बन्जाडे, विष्णु पाण्डेलगायतको सहभागिता रहेको थियो ।
कार्यक्रममा नेकपा (मसाल) काठमाडौंका प्रवक्ता जगत प्रसाद रेग्मी, राष्ट्रिय जनमोर्चाका जिल्ला अध्यक्ष झविन्द्र बेलबासे, नेताहरु भक्त विक, छवि खनाल, अमर थापा, ईश्वरीप्रसाद शर्मा लगायतको उपस्थिती रहेको थियो ।
