कुल बहादुर छन्त्याल, ढोरपाटन ।
राष्ट्रिय जनमोर्चा बागलुङले सातौं जिल्ला सम्मेलनको सन्देश प्रवाह गर्न जिल्लाब्यापी रुपमा सन्देश सभा गरिरहेको छ ।
राजमो बागलुङको सातौं जिल्ला सम्मेलन गएको फागुन १९ देखि २१ गतेसम्म सम्पन्न भएको थियो । जिल्ला सम्मेलनको म्यान्डेट अनुसार नै पालिकाहरुमा सन्देश सभा गरिएको राजमो बागलुङले जनाएको छ ।
शनिवार बुर्तिबाङ बजारमा सम्पन्न ढोरपाटन नगरपालिकास्तरीय कार्यक्रममा प्रमुख अतिथी राष्ट्रिय जनमोर्चाका केन्द्रीय सदस्य गौरीश्वर पाण्डे हुनुहुन्थ्यो ।
सन्देश सभामा बोल्दै पाण्डेले सातौं जिल्ला सम्मेलनले पार्टीलाई नयाँ जोशका साथ अगाडि बढ्ने म्याण्डेड दिएको बताउनुभयो । उहाँले जनस्तरमा पार्टीको नीति तथा कार्यक्रम र जनजीविकाको सवाल लिएर जानुपर्ने कुरामा जोड दिनु भयो ।
पाण्डेले संघीयताका कारण देशमा चरम आर्थिक सङ्कटको आएको भन्दै संघीयता खारेज नगरे देशी विदेशी शक्तिले नेपालको अस्तित्व समाप्त पार्ने खतरा बढेको बताउनुभयो ।
कार्यक्रममा अखिल नेपाल शिक्षक संघका जिल्ला उपाध्यक्ष दुर्गा बहादुर भण्डारी, ढोरपाटन नगरपालिका वडा नं ७ का अध्यक्ष एवम् राजमो जिल्ला सदस्य धन बहादुर अदै, बुद्धिजीवि संघका धनबहादुर कुँवर तथा राजमो निकट विभिन्न जनवर्गीय संङ्गठनका नेता कार्यकर्ताको उपस्थिति रहेको थियो ।
अराजकता र संघीयता खारेज लगायतका माग राखेर राष्ट्रिय जनमोर्चाले आगामी नयाँ जनसंघर्षको कार्यक्रम समेत सार्वजनिक गरेको छ ।
९ वटै वडाका राजमो वडा अध्यक्षहरुको उपस्थितिमा सम्पन्न नगर उपाध्यक्ष तम बहादुर घर्तीको अध्यक्षतामा भएको कार्यक्रमको स्वागत सचिव तुल्सीराम खरेल र सन्चालन राजमो ढोरपाटन नगर कार्यलय सचिव कुल बहादुर छन्त्यालले गर्नुभएको थियो ।
