खिमराज चालिसे चंडिगढ ।
नेपाली युवती चम्पा गन्धर्वको शंकास्पद मृत्युको घटनाबारे गम्भीरतापूर्वक अनुसन्धान गर्न माग गर्दै मूल प्रवाह अखिल भारत नेपाली एकता समाजसहित विभिन्न ६ वटा संगठनले प्रहरीलाई ज्ञापन पत्र बुझाएका छन् ।
मूल प्रवाहका केन्द्रीय उपाध्यक्ष कपिल खनालको नेतृत्वमा गएको प्रतिनिधि मण्डलले बुधबार पंचकुलाका प्रहरी कमिश्नर संजय कुमारलाई भेटी ज्ञापनपत्र बुझाएको हो ।
प्रतिनिधि मण्डलको पहिलो माग अनुसार आयुक्तको निर्देशनमा प्रहरीसँग प्रतिनिधिमण्डलले घटनास्थलको पुनः निरीक्षणसमेत गरेको छ।
कपिलवस्तु जिल्लाको बाढगंगा नगरपालिका–६ गणेशपुरकी चम्पा गन्धर्व गत मार्च १६ मा शकास्पद अवस्थामा मृत भेला परेकी थिइन् । उनको मृत्यु प्रकरणमा परिवार र भारतस्थित नेपाली संघसंस्थाहरुले मृत्युको प्रकृति हेर्दा शंकास्पद रहेकोले हत्याको आशंका गरेका छन् ।
चम्पाको शंकास्पद मृत्युपछि संयुक्त संघर्ष समितिले प्रहरी चौकी घेराउ गरेपछि मात्र एफआईआर दर्ज गरिएको थियो । घटनाको २० दिनसम्म पनि मकान मालिक आसिस पन्धी र डा। नलिनी पन्धीलाई पुलीसले नियन्त्रण नलिनु, अन्य कर्मचारीहरूसँग कडाइपूर्वक सोधपूछ नगरिनु जस्ता कैयौं शकास्पद गतिविधीले हत्यालाई आत्महत्याको रुप दिन खोजेको शंका गर्दै प्रतिनिधिमण्डल प्रहरी प्रमुखसँग भेटेको हो ।
प्रतिनिधिमण्डलमा मूल प्रवाहका उपाध्यक्ष कपिल खनाल, केन्द्रीय सदस्यहरु दिनेश खडका र प्रेम आचार्य, प्रवासी नेपाली संघ भारतका केन्द्रीय नेताहरु मिना पोख्रेल, मिना ओली, प्रवासी नेपाली एकता मञ्च, भारतका अध्यक्ष गोविन्द पाण्डे, सदस्य दिपक थापा र लोकदोहोरी प्रतिष्ठानका भारत शाखा अध्यक्ष ललित गिरी सहभागी हुनुहुन्थ्यो ।
घटनास्थलको निरीक्षणमा मूल प्रवाहका केन्द्रीय सचिव एवम् सुदूर पश्चिमोत्तर क्षेत्रीय अध्यक्ष प्रेम सापकोटा पनि स्थानीय प्रहरी र डेलिगेशन टिममा सहभागी हुनुहुन्थ्यो।
डेलिगेसनप्रति नेपाली जनसम्पर्क समिति र अखिल भारत नेपाली एकता मञ्चले समर्थन जनाएका छन् ।
घटनास्थलको निरीक्षणपछि चम्पाको मृत्यु आत्महत्या नभई हत्या गरिएको हुन सक्ने प्रशस्तै तथ्यहरु देखिएको उपाध्यक्ष कपिल खनालले बताउनु भयो ।
