काठमाडौं । प्रधानमन्त्री पुष्पकमल दाहाल प्रचण्डले राष्ट्रिय स्वतन्त्र पार्टीका सभापति रवि लामिछाने उपनिर्वाचनअघि नै सरकारमा आउन चाहेको बताउनुभएको छ ।
मंगलबार बालुवाटारमा बसेको गठबन्धनको बैठकमा प्रधानमन्त्रीले लामिछाने तत्काल सरकारमा आउन चाहेपनि उपनिर्वाचनअघि आफूले ल्याउन नसक्ने बताउनुभएको थियो ।
बैठकमा सहभागी एक नेताका अनुसार त्यसबारे प्रधानमन्त्रीले गठबन्धनमा सहभागी दलहरुको धारणा माग्नुभएको थियो ।
बैठकअघि रवि लामिछाने सिंहदरबारमा प्रधानमन्त्रीलाई भेट्न पुगेका थिए । मन्त्री बन्न चाहेका रविलाई प्रधानमन्त्रीले उपनिर्वाचन पर्खिन आग्रह गरेको ती नेताले बताए । आफूबाहेक अरुलाई सरकारमा पठाउन प्रधानमन्त्रीले गरेको आग्रहप्रति रविले आनाकानी गरेको प्रधानमन्त्रीको भनाई थियो ।
मन्त्रिमण्डल विस्तारबारे छलफल गर्न बसेको सत्तारुढ १० दलीय गठबन्धनको बैठकमा त्यसबारे सहमति भने भएन । दलहरुले आफ्नो आफ्नो दाबी नछोड्दा बिना निस्कर्ष सकिएको हो । बैठकपछि सञ्चारकर्मीहरुसँग कुरा गर्दै नेपाली काँग्रेसका प्रमुख सचेतक रमेश लेखकले बैठक सकारात्मक रहेको र बुधवार पुनः बसेर निस्कर्ष निकाल्ने बताउनु भयो । उहाँले आजको बैठकमा सरकारको न्युनतम साझा कार्यक्रमको मस्यौदा छलफलका लागि पेस भएको बताउनु भयो ।
उहाँले भन्नुभयो, ‘सरकार पक्षीय राजनीतिक दलका नेताहरुको बेठक बस्यो सरकारको न्युनतम साझा कार्यक्रमको मस्यौदा छलफलका लागि पेस भयो । भोलि फेरि बस्ने भन्नेछ । भागबण्डाको बारेमा छलफल भएन । सरकार चाँडो भन्दा चाँडो सरकार बिस्तार गर्ने कुरा भयो । सरकार चाँडै बिस्तार हुनेगरी छलफल भयो ।’
प्रमुख सचेतक लेखकले मन्त्रालयको बारेमा केही समस्या नरहेको दाबी गर्नुभयो । आजको बैठकमा मन्त्रालय भागबण्डाको विषयले प्रवेश नपाएको उहाँको दाबी थियो ।
बैठकमा सहभागी राष्ट्रिय जनमोर्चाले भने मन्त्रिपरिषद विस्तार र सरकारको न्यूनतम साझा कार्यक्रमबारे अरुची देखाएको छ । बैठकमा आएका जनसरोकारका एजेण्डामा आफ्ना धारणा राखेको राजमो सरकार विस्तारको एजेण्डा आएपछि बाहिरिएको थियो ।
‘प्रधानमन्त्रीले बोलाएको बैठकमा मिटरब्याज पीडितका समस्याबारे छलफल भयो’ राजमो महासचिव मनोज भट्टले भन्नुभयो, ‘सरकार विस्तार र न्युनतम साझा कार्यक्रमको एजेण्डाबारेको छलफलमा हामी सामेल भएनौँ । यो तपाइँहरुको विषय हो भनेर हामी निस्कियौँ ।’
महासचिव भट्टका अनुसार राजमो सरकारमा सामेल नहुने भएकोले सरकारको न्यूनतम साझा कार्यक्रममा पार्टीले कुनै सुझाव दिनेछैन ।
बैठकमा राष्ट्रिय जनमोर्चाको तर्फबाट अध्यक्ष चित्रबहादुर केसी र महासचिव भट्ट सहभागी हुनुहुन्थ्यो ।
