काठमाडौँ । अखिल नेपाल किसान महासङ्घ (अप्फा) ले मिटरब्याज विरुद्धको आन्दोलनप्रति ऐक्यबद्धता व्यक्त गरेको छ ।
अध्यक्ष भैरवराज रेग्मीको हस्ताक्षरमा २०७९ चैत १३ गते सोमबार जारी प्रेसवक्तव्यमार्फत् अप्फाले सो धारणा व्यक्त गरेको हो ।
मिटरब्याज पीडितको राजधानीस्थित माइतिघर मण्डलामा जारी आन्दोलनप्रति ऐक्यबद्धता जारी गर्दै अप्फाले वक्तव्य जारी गरेको छ ।
प्रेसक्तव्यमा मिटरब्याजीलाई कडा कानुन निर्माण गरी उनीहरूमाथि कडा कारबाही गर्न, मिटरब्याजमाथि प्रतिबन्ध लगाउन र पीडितको सम्पत्ति फिर्ता गर्न माग गरिएको छ ।
यस्तो छ, प्रेसवक्तव्यको पूर्ण पाठ :
“मिटरब्याजी पीडितले लामो समयदेखि काठमाडौँमा आएर आन्दोलन गरिरहेका छन् । उनीहरूको माग पूरा हुनुपर्छ भनेर अखिल नेपाल किसान महासङ्घ (अप्फा) ले पनि माग गरेको छ र उनीहरूको मागप्रति ऐक्यबद्धता जाहेर गर्दै आइरहेको छ । यस सिलसिलामा अखिल नेपाल किसान महासङ्घ (अप्फा) सहित ६ वामपन्थी किसान सङ्गठनले ५९ बुँदे मागमा मिटरब्याजीको समेत माग समावेश गरी ऐक्यबद्धतासहित आन्दोलनमा उत्रिएको छ । यसरी मिटरब्याजी पीडितको मागप्रति सम्पूर्ण किसानको समर्थन रहेको छ ।
गणतन्त्र आएपछि र गणतान्त्रिक संविधानमा समाजवादउन्मुख अर्थप्रणाली व्यवस्था समावेश गरिएता पनि यसको विपरीत आम जनतामाथि लादिएका चक्रवृद्धि ब्याजको सामन्ती प्रणाली अहिले नयाँ र परिष्कृत रूपमा मिटरब्याज आतङ्क, लघुवित्तीय संस्थाहरूले अपनाइरहेको चक्रवृद्धि ब्याजको प्रणाली र ठुला वित्तीय संस्थाले समेत मासिक ब्याज, प्रवेश शुल्क, परियोजनाको धितो मूल्याङ्कन, कमिसन आदि प्रणालीले चक्रवृद्धि ब्याजको व्यवस्था समातेको यो अवस्थामा आम जनताले आत्मदाह/आत्महत्या, आफ्नो सीमित सम्पत्तिबाट वञ्चित भई सुकुम्बासी हुनुपर्ने र ठुलो सङ्ख्यामा खाडी मुलुकमा पलायन हुनुपर्ने जस्ता भयावह स्थिति खडा भइरहेको छ । यो अवस्थामा सरकार किन मूकदर्शक बनेर बसिरहेको छ ?
अहिले देशभरका मिटरब्याजी पीडित काठमाडौँको माइतिघर मण्डलामा धर्ना दिइरहेका छन् । मिटरब्याजीलाई कारबाही गरेर पीडितको समस्या समाधान गर्नुपर्नेमा सरकारले गत साल तथाकथित आह्वान गरेर मिटरब्याजीलाई संरक्षण गर्न खोजेको छ । त्यसैले मिटरब्याजीलाई कडा कानुन निर्माण गरी उनीहरूमाथि कडा कारबाही गर्न, मिटरब्याजमाथि प्रतिबन्ध लगाउन र पीडितको सम्पत्ति फिर्ता गर्न माग गर्दछ । यदि यो काममा सरकार नलागेमा किसानहरू आन्दोलनको आँधीबेहरी सिर्जना गर्न बाध्य हुने छन् ।”
