काठमाडौँ । नेकपा (मसाल) ले राष्ट्रिय स्वतन्त्र पार्टीका नेता रवि लामिछानेलाई दोहोरो राहदानीसम्बन्धी मामिलामा उन्मुक्ति दिनु गलत भएको ठहर गरेको छ ।
महामन्त्री मोहनविक्रम सिंहको हस्ताक्षरमा २०७९ चैत ७ गते मङ्गलबार प्रेसवक्तव्य जारी गर्दै मसालले यस्तो धारणा व्यक्त गरेको हो ।
राजनीतिक सौदाबाजीका लागि प्रधानमन्त्रीले गृह मन्त्रालय, प्रहरी प्रशासन र महान्यायाधिवक्तासमेत माथि दबाब दिएर सो निर्णय गराएको बताउँदै वक्तव्यमा त्यो भन्दा महत्त्वपूर्ण विषय रविको पार्टी अमेरिकी साम्राज्यवादको स्वार्थपूर्तिका लागि बनेको र त्यो पार्टीको गतिविधिबाट नेपालको राष्ट्रियता र सार्वभौमिकतामाथि गम्भीर आँच पुग्ने बताइएको छ ।
कथित स्वतन्त्र पार्टीको यस्तो चरित्रबारे मसाल र राष्ट्रिय जनमोर्चाबाहेक अरू कसैको पनि ध्यान नगएको बताउँदै वक्तव्यमा त्यसबारे उच्च प्रकारको सतर्कता अपनाउन आम जनतासित अपिल गरेको छ ।
यस्तो छ, प्रेसवक्तव्यको पूर्ण पाठ :
“कथित स्वतन्त्र पार्टीका नेता रवि लामिछानेको दोहोरो राहदानीको मुद्दामा उनलाई सफाइ दिने प्रहरीदेखि महान्यायाधिवक्तासमेतको निर्णयलाई हाम्रो पार्टीले गलत मान्दछ र त्यसको कडा शब्दमा भत्र्सना गर्दछ ।
यो कुरा स्पष्ट छ कि त्यस प्रकारको रवि लामिछानेलाई सफाइ दिने निर्णय कानुनी आधारमा नभएर राजनीतिक सौदाबाजीको आधारमा नै गरिएको हो । अहिले गृह मन्त्रालय प्रधानमन्त्री प्रचण्डको मातहमा नै छ । उनले कथित स्वतन्त्र पार्टीको विश्वासको मत प्राप्त गर्न नै कानुन र न्यायसमेतलाई मिचेर प्रहरी प्रशासन तथा महान्यायाधिवक्तासमेत माथि दबाब दिएर यस प्रकारको निर्णय गर्न लगाएको कुरा बुझ्न गार्हो पर्दैन ।
रवि लामिछानेको दोहोरो राहदानीको सन्दर्भमा अहिले जुन निर्णय गरिएको छ, त्यो गलत त छ नै तर अहिले उनको सन्दर्भमा उनको नागरिकता र राहदानीबारे जुन विवाद उठेको छ, त्योभन्दा गम्भीर र राजनीतिक महŒवको प्रश्न यो हो कि उनको राजनीतिक दल अमेरिकी साम्राज्यवादको स्वार्थपूर्तिका लागि बनेको हो । त्यसकारण त्यो सङ्गठनको गतिविधिका कारणले देशको सार्वभौमिकता र राष्ट्रियतामा गम्भीर आँच पुग्ने कुरा प्रष्ट छ । त्यो राजनीतिक सङ्गठनको सन्दर्भमा यो नै प्रधान पक्ष हो तर दु:खको कुरा यो हो कि त्यसप्रति नेकपा (मसाल) र राष्ट्रिय जनमोर्चाबाहेक अन्य राजनीतिक दल, सञ्चार माध्यम र बुद्धिजीवीसमेतको ध्यान गएको पाइँदैन । त्यही सन्दर्भमा अहिले माओवादीका अध्यक्ष तथा प्रधानमन्त्री प्रचण्डले समेत उनीप्रति अपनाएको सम्झौतापरस्त नीति गम्भीर चिन्ताको विषय हो र त्यो नीतिका दीर्घकालीन दुष्परिणाम हुने कुरा निश्चित छ ।
हाम्रो पार्टीले कथित स्वतन्त्र पार्टीको त्यस प्रकारको अमेरिकी साम्राज्यवादपरस्त चरित्र र त्यसका गतिविधिका विरुद्ध उच्च सतर्कता अपनाउन सम्पूर्ण नेपाली जनताको ध्यान आकर्षित गर्न चाहन्छ ।”
