बेल बहादुर रजाली, जयपुर ।
मूल प्रवाह अखिल भारत नेपाली एकता समाजका केन्द्रीय अध्यक्ष ठाकुर खनालले जनआन्दोलनबाट प्राप्त उपलब्धिको रक्षा अहिलेको महत्वपूर्ण कार्यभार भएको बताउनुभएको छ ।
मूल प्रवाह पश्चिमोत्तर तथा मध्य पश्चिमोत्तर क्षेत्रीय समितिको आगामी अप्रिल २२–२३ मा सम्पन्न हुने दशौं क्षेत्रीय सम्मेलनको तयारी स्वरूप नगर समिति जयपुर उत्तर एवं दक्षिणद्वारा आयोजित प्रचारात्मक सभालाई सम्बोधन गर्दै सो कुरा बताउनु भएको हो।
उहाँले बुर्जुवा गणतन्त्रले मेहनतकस जनताको हित गर्न नसक्ने स्पष्ट पार्दै नयाँ जनवादी व्यवस्था स्थापनाका लागि अघि बढ्नुपर्ने अहिले आवश्यकता हो भन्नुभयो । तर, सिमित उपलब्धिसमेत गुम्ने अवस्था आएकोले यसको रक्षा गर्दै अघि बढ्नुपर्ने उहाँले बताउनुभयो ।
खनालले भन्नुभयो, ‘अहिलेको यो व्यवस्था बुजुर्वा गणतन्त्र हो। यसले बहुसंख्यक मेहनतकश वर्गको हित गर्दैन। यसको ठाँउमा नयाँ जनवादी गणतन्त्रको स्थापना गर्नु हाम्रो लक्ष्य हो। तर राजतन्त्रको तुलनामा गणतन्त्र राम्रो व्यवस्था हो। त्यसैले अहिले गणतन्त्र नै गुम्ने, राजतन्त्र फेरि फर्काउने षडयन्त्र चलिरहेको कारण गणतन्त्रलाई जोगाउनको निम्ति राजतन्त्र विरोधी तथा गणतन्त्र पक्षधर सबै शक्तिहरूसित सहकार्य गरेर अगाडि बढनु पर्ने आजको आवश्यक्ता हो।’
त्यस्तै अर्का अतिथि केन्द्रीय सदस्य बेल बहादुर रजालीले मूल प्रवाह अखिल भारत नेपाली एकता समाज बलियो वैचारिक धरातलमा उभिएको हुनाले बेला बेलामा देखा पर्ने विभिन्न भ्रमजाललाई परास्त गर्दै आज यो अवस्थामा आउन सफल भएको बताउनु भयो ।
कार्यक्रममा केन्द्रीय सदस्य मोहन गिरी, केन्द्रीय परिषद सदस्य दीपा थापा, केन्द्रीय जनजाति विभागका ओम थापा, मूल प्रवाह क्षेत्रीय सचिव नारायण ज्ञवाली, क्षेत्रीय महिला विभाग संयोजक कल्पना थापा, क्षेत्रीय सांस्कृतिक विभागका नारायण पौडेल, मूल प्रवाह जयपुर दक्षिणका अध्यक्ष रिम रानाको समेत आतिथ्यता रहेको थियो ।
बाबुराम थापाको अध्यक्षता र टंक थापाको संचालनमा भएको सो कार्यक्रममा शहीदहरुप्रति एक मिनेट मौन धारण गरिएको थियो भने आगन्तुकलाई रामप्रकाश शर्माले स्वागत गर्नु भएको थियो ।
