बुटवल । लुम्बिनीमा एकैदिन पाँच सय भिक्षु बनेका छन् ।
अखिल नेपाल भिक्षु महासङ्घ र थाई भिक्षु महासङ्घको आयोजना तथा लुम्बिनी विकास कोषको सहआयोजनामा २०७९ चैत २ गते बिहीबार मायादेवी मन्दिर परिसरमा आयोजित धार्मिक कार्यक्रममा पाँच सयलाई कुलपुत्र प्रवज्या गरी अल्पकालीन भिक्षु बनाइएको हो ।
अखिल नेपाल भिक्षु महासङ्घका महास्थवीर धम्म शोभन र धम्मकाय फाउन्डेसनका उपप्रमुख भिक्षु फरा पभनाले अल्पकालीन भिक्षुका लागि चिवर प्रदान गर्नुभयो । अल्पकालीन भिक्षुले पहेँलो चिवर लगाएर बुद्ध धर्मका एक सय नियम पालना गर्नुपर्ने छ ।
सामान्य अनुयायीले पञ्चशील र अष्टशीलको पालना गर्ने भए पनि अल्पकालीन भिक्षुले २० दिनसम्म पूर्ण रूपमा बौद्धनियममा आफूलाई रूपान्तरण गर्नुपर्ने छ । चैत १७ गते अल्पकालीन भिक्षुको समय सकिने छ ।
फागुन २७ गते काठमाडौँ र फागुन २८ गते लुम्बिनीमा गरी पाँच सय भिक्षुको केश मुन्डन गरिएको थियो । केश मुन्डन गरिए पनि बिहीबार मात्रै प्रवज्या गरी अल्पकालीन भिक्षुका रूपमा पहेँलो चिवर प्रदान गरिएको लुम्बिनी विकास कोषका सदस्य सचिव सानुराजा शाक्यले जानकारी दिनुभयो ।
चिवर प्रदान एवम् कुलपुत्र प्रवज्या कार्यक्रममा लुम्बिनी विकास कोषका उपाध्यक्ष अवधेशकुमार त्रिपाठीले सबैले बुद्धको शिक्षा ग्रहण गर्न आवश्यक रहेको बताउनुभयो ।
कार्यक्रममा अखिल नेपाल भिक्षु सङ्घका महास्थवीर शोभनले बुद्ध शिक्षालाई व्यवहारमा उतार्न आग्रह गर्नुभएको थियो ।
कोरोना महामारीका कारण तीन वर्षसम्म प्रवज्या कार्यक्रम स्थगित भएको थियो । यसअघि सन् २०११ मा एक हजार, सन् २०१५ मा एक हजार एक सय १२ र सन् २०१९ मा एक हजार एक सय १९ जनालाई प्रवज्या गराइएको थियो ।
