काठमाडौं । प्रधानमन्त्री पुष्पकमल दाहाल प्रचण्डले यही चैत ६ गते विश्वासको मत लिने हुनुभएको छ । प्रधानमन्त्री बनेको करिब अढाई महिनापछि प्रधानमन्त्रीले प्रतिनिधि सभामा पुनः विश्वासको मत लिने मिति तय गरिएको हो ।
संसद्का प्रवक्ता एकराम गिरीले चैत ६ गते विश्वासको मत लिनका लागि बिहीबार प्रधानमन्त्रीको पत्र आएको जानकारी दिनुभयो ।
राष्ट्रिय प्रजातन्त्र पार्टीको समर्थन फिर्ताको मितिले चैत १२ गतेसम्म विश्वासको मत लिनुपर्ने संवैधानिक समयसीमा छ । यसअघि पुस २६ गते पहिलो पटक प्रधानमन्त्रीले विश्वासको मत लिनुभएको थियो ।
राष्ट्रपति निर्वाचनको पूर्वसन्ध्यामा एमाले–माओवादी गठबन्धन टुटेपछि सरकारका सामेल नेकपा (एमाले), राप्रपालगायतका दलले समर्थन फिर्ता लिँदै सरकारबाट बाहिरिएका थिए। सत्ता सहकार्यमा रहेको दलको समर्थन फिर्ता भएपछि प्रधानमन्त्रीले संसदबाट पुनः विश्वासको मत लिनुपर्ने संवैधानिक व्यवस्था छ।
विश्वासको मतका लागि प्रधानमन्त्रीलाई १३८ सांसद आवश्यक पर्नेछ। सरकारको नेतृत्व गरिरहेको माओवादी केन्द्रको प्रतिनिधि सभामा ३२ सिट छ। यस्तै, कांग्रेसको ८९ सिट भए पनि एकको मताधिकार छैन।
राष्ट्रिय स्वतन्त्र पार्टीको २०, एकीकृत समाजवादीको १०, जसपा १२, एकीकृत समाजवादी १०, जनमत पार्टी छ, नागरिक उन्मुक्तिको तीन र राष्ट्रिय जनमोर्चाको एक सिट छ।
यस्तै, एमालेको ७९ र राप्रपाको १४ सिट प्रधानमन्त्रीको विपक्षमा हुने निश्चितजस्तै छ।
