काठमाडौँ । अखिल (छैठौँ) ले मध्यपश्चिम विश्वविद्यालयले स्ववियु निर्वाचन रोकेकोमा घोर विरोध गरेको छ ।
अध्यक्ष देवेन्द्र कुँवरको हस्ताक्षरमा २०७९ चैत ३ गते जारी प्रेसवक्तव्यमा अखिल (छैठौं) ले सो जानकारी दिएको हो ।
प्रेसवक्तव्यमा सामान्य बहानामा दसौँ वर्षसम्म क्याम्पसलाई स्ववियुविहीन बनाउने क्याम्पस प्रशासनको संस्कार नै बनेको आरोप लगाइएको छ ।
उच्च अदालत सुर्खेतले स्ववियुको निर्वाचन रोक्ने आदेश जारी गरेसँगै स्ववियु निर्वाचन स्थगित भएको हो।
अविलम्ब स्ववियु निर्वाचनको घोषणा गर्न माग गरिएको उक्त प्रेस विज्ञप्तिको पूर्ण पाठ यस्तो छ :
मध्यपश्चिम विश्वविद्यालय कार्यकारी परिषद्को मिति २०७९ चैत २ गते बसेको बैठकले विश्वविद्यालय र त्यसका आङ्गिक क्याम्पसमा यही चैत ३ गते हुन गइरहेको स्ववियु निर्वाचन स्थगित गरेको निर्णयप्रति हाम्रो सङ्गठनको गम्भीर ध्यानाकर्षण भएको छ ।
विद्यार्थीको आधारभूत अधिकारको रूपमा रहेको स्ववियु निर्वाचनलाई विश्वविद्यालय र क्याम्पसले साधारण र सामान्य बहानामा स्थगित गर्ने र दसौँ वर्ष निर्वाचन नगरी क्याम्पसलाई स्ववियुविहीन बनाउने प्रवृत्ति क्याम्पस प्रशासनहरूको संस्कार जस्तै बनेको छ ।
मध्यपश्चिम विश्वविद्यालयले पनि अनावश्यक बहाना र बिनाकारण स्ववियु निर्वाचन स्थगित गरेको छ । हामीले विश्वविद्यालयको यस प्रकारको रवैयाको घोर भत्र्सना गर्दछौँ र यथाशीघ्र निर्वाचन घोषणा गर्न हार्दिक अपिल गर्दछौँ ।
