काठमाडौं । मिटरब्याजी ऋण दिएर करिब १३ सय सर्वसाधारणलाई ठगी गरेका सर्लाहीका कुख्यात सुदखोर रामबाबु राय यादवलाई १५ लाख धरौटीमा छोड्न अदालतले आदेश दिएको छ ।
मंगलबार जिल्ला अदालत सर्लाहीका न्यायाधीश हरिप्रसाद कोइरालाको इजलासले आरोपी यादवलाई १५ लाख धरौटीमा रिहा गर्न आदेश दिएको हो । तर यादव भने धरौटीबापतको रकम जम्मा नगरेपछि कारागार चलान भएका छन् ।
सुदखोर यादवलाई १५ लाख धरौटीमा छाड्ने अदालतको निर्णयप्रति पीडितहरुले आपत्ति जनाएका छन् । यति ठूलो बिगोसहितको मुद्दाका अभियुक्तलाई १५ लाख रुपैयाँ धरौटीमै छाड्ने न्यायाधीशको निर्णयविरुद्ध पीडितले न्यायपरिषद गुहार्ने तयारी गरेका एक स्थानीयले बताए ।
यादवविरुद्ध २८ जना पीडितले प्रहरीमा उजुरी दिएका छन्। पीडितले दिएका २८ उजुरीको आधारमा प्रहरीले २० करोड ४४ लाख रुपैयाँ बिगो दाबीसहित यादवविरुद्ध ठगी तथा आपराधिक विश्वासघात सम्बन्धी कसुरमा अभियोगपत्र दर्ता गरेको छ ।
यादवलाई प्रहरीले २३ पुसमा पक्राउ गरेको थियो। अर्का सुदखोर सञ्जय साह रौनियार भने अझै फरार छन् । यादव र रौनियारले मिटरब्याजमा ऋण लगानी गरेर सर्लाहीसहितका जिल्लाका सयौँ सर्वसाधारणको उठिबास लगाइसकेका छन् । उनीहरुबाट सर्लाही, महोत्तरी, रौतहट लगायतका जिल्लाका झण्डै १३ सय सर्वसाधारण पीडित भएको अनुमान छ ।
यादवको सम्पत्ति छनविन गर्न सम्पत्ति शुद्धीकरणमा समेत मुद्दा परेको छ । मुद्दापछि अदालतले यादवको सम्पूर्ण सम्पत्ति रोक्का गरेको छ ।सम्पत्ति रोक्का भएका कारण धरौटीबापतको रकम बुझाउन नसकेको दाबी उनका भाइ लालबाबु राय यादवले गरेका छन् ।
